УИХ-ын чуулганы үдээс хойшхи хуралдаан 15.00 цагт зарлагдсан байсан ч гишүүдийн ирц бүрдэхгүйгээс шалтгаалж 16.00 цаг дөхүүлж эхлэв. Одоо тус хуралдаанаар Монгол Улсын 2013 оны нэгдсэн төсвийн тухай хуулийн төслийн гурав дахь хэлэлцүүлгийг хийж эхлээд байна. Хэлэлцэж байгаа асуудалтай холбоотойгоор нефтийн бүтээгдэхүүний хангалт ямар байгаа талаар хариулт өгөхийг УИХ-ын гишүүн Ц.Нямдорж хүсэв.

Уул уурхайн сайдын тайлбараар бол Монгол Улс дизель түлшний 12 хоногийн нөөцтэй бол авто бензиний 48 хоногийн нөөцтэй байгаа аж. Гэхдээ энэ нь төмөр замаар тээвэрлэгдэн ирж буй нефтийн бүтээгдэхүүнийг оруулаад тооцсон тоон үзүүлэлт гэв. УИХ-аас энэ төрлийн бүтээгдэхүүний нөөц бүрдүүлэхтэй холбоотой тогтоол гаргаж байсан. Түүнд 120 хоногийн нөөцтэй байх ёстойг хуулиар баталгаажуулж өгсөн ч  аль ч шатанд хууль хэрэгжилгүй явж ирснээс өнөөдрийн хүнд нөхцөлд ирээд байгаа тухай сайд онцоллоо.