Тур де Франс уралдааны аварга, олимпийн аварга дугуйчин Брэдли Уиггинс гэрийнхээ ойролцоо дугуйтай салхилж яваад автомашинд мөргүүлжээ. Ослын дараа түүнийг эмнэлэгт хүргэсэн байна. Гэрчүүдийн мэдүүлгээр ШТС-аас гарч явсан автомашин нэрт тамирчныг мөргөсөн бөгөөд Уиггинс дугуйнаасаа шидэгдэн унасан гэнэ. Түүний харьяалагддаг “Team Sky” багийн зүгээс ослыг тийм ч ноцтой биш хэмээн мэдэгджээ. “Брэдли Уиггинс эмнэлэгт хэвтэж, шаардлагатай бүхий л үзлэг, оношилгоог хийлгэсэн. Хүнд ноцтой бэртээгүй тул удахгүй бүрэн эдгэрнэ гэдэгт итгэж байна” хэмээн багийн мэдэгдэлд дурдсан байна.