ОХУ-ын Ерөнхийлөгч В.Путин хээл хахуулийн хэрэгт орооцолдсон  Батлан хамгаалахын сайдаа огцруулжээ. Батлан хамгаалахын сайдаас огцорсон Анатолий Сердюковын оронд Онцгой байдлын яамны сайд асан, В.Путины үнэнч холбоотон Сергей Шойгу томилогджээ. ОХУ-ын хамгийн шилдэг мөрдөн байцаах алба Батлан хамгаалах яамны хөрөнгийг зах зээлийн үнээс хямдаар худалдаалсан хэргийг шалгаж байгаа юм байна. Мөрдөн байцаах алба өнгөрсөн сард төрийн оролцоот армийн ханган нийлүүлэх газарт нэгжлэг явуулж, төрийн өмчийг хувийн компаниудад зах зээлийн үнээс доогуур үнээр худалдаж улсад гурван тэрбум рублийн хохирол учруулсан гэх хэргийг шалгаж эхэлсэн юм.

Оросын хэвлэлүүдэд бичсэнээр улсын хөрөнгийг шамшигдуулсан хэргийн гол сэжигтэнтэй холбоотой байсан нь Анатолий Сердюковыг тун хэцүү байдалд оруулаад байгаа бололтой. Нөгөө талаар BBC-д бичсэнээр улсын хөрөнгийг шамшигдуулсан гэх хэрэг нь Анатолий Сердюковыг унагах зорилготой улс төрийн явуулга ч байж болох бөгөөд армид том цомхотгол хийх Оросын армид шинэчлэл явуулах хөтөлбөр нь яам болон армийн албан хаагчдын томоохон эсэргүүцэлтэй тулгарч байсан юм байна.  Анатолий Сердюковыг огцруулах тухай мэдээг сонсоод ОХУ-ын Батлан хамгаалах зөвлөлийн тэргүүн баярлаж буйгаа нуухгүй байсан гэнэ.

В.Путины хувьд ойрын хүрээлэл дэх хүмүүсээ өмгөөлж хамгаалж, хариуд нь үнэнч байхыг шаарддаг нэгэн боловч ОХУ-ын армид хагарал бутрал үүсэхийг хүсээгүй бололтой.

ОХУ-ын Мөрдөн байцаах албаны төлөөлөгч Владимир Маркин “Хэрэв шаардлагатай гэж үзвэл Сердюковоос мэдүүлэг авна” хэмээжээ.
Анатолий Сердюков 2007 онд ОХУ-ын Батлан хамгаалахын сайдаар томилогдохоос өмнө тавилгын дэлгүүрийн эзэн, Татварын албаны дарга байсан гэнэ.