Сансарын тунелийн зүүн талд байрлах нүхэн гарц баригдаж дуусах хугацаа “сунжралтай”  байна. Одоогийн байдлаар энэ хавиар дайн болсон гэлтэй шороо манарч, машин механизм үзэгдэнэ. Хэтрүүлж хэлсэн биш, үнэхээр л үүгээр явахад төвөгтэй байна. Сунжралтай гэх учир нь уг нь нүхэн гарц барихад зориулсан зорчих хэсгийн зам барилгын ажил есдүгээр сарын 1-нд дуусгаж, зорчих хэсгийг нээх төлөвлөгөөтэй байж. Харин нүхэн гарцын гаднах, доторх барилгын ажлыг 10 дугаар сарын 30-нд дуусгахыг төлөвлөж байсан гэнэ. Тэгтэл зорчих хэсгийг 10 дугаар сарын 15-нд нээсэн. Харин одоо 11 дүгээр сар гарчихлаа. Нүхэн гарц баригдаж дуусаагүй байна. Дотор нь хэн ч ажиллахгүй биш, ажиллаж л байна. Хаа газарт зам засч байна гэхээрээ л дэл сул шороо, чулуу , блок овоорсон ийм л байх ёстой гэж үү? “Энэ нээгдсэн замыг зассан ч юм уу” гэж иргэд их шүүмжилж байна. Хотын иргэд долдугаар сарын сүүлчээс эхлээд тунелийг тойрч, урд, хойд хоёр талаар нь ажил, сургуульдаа хоцрон байж гэтэлгэсний дүнд зассан нь ялгарахгүй замаар ялгаагүй явах гэж үү?  Гол нь зам барилгын ажлыг хугацаандаа дуусгаж чадахгүй бол тухайн гүйцэтгэгч компанид хариуцлага тооцож, торгодог журамтай байтал ямар нэгэн арга хэмжээ аваагүй ажээ.

Энэ нүхэн гарц нийт нэг тэрбум 321 сая төгрөгийн өртгөөр бүтэж буй бөгөөд дөрвөн тал руугаа гардаг гарцтай, 6.3 м өргөн хонгилтой гэнэ. Одоогийн байдлаар нүхэн гарцын доторх шат болон будгийн ажлыг хийж байгаа юм байна.  “Ингээд ер нь 10 хоногийн ажил байна” гэж ажилчид нь хэлж байсан.  Дараа нь нүхэн гарцын хажуугийн дуусаагүй байгаа  замыг аспальтаар хучина гэв.  Ийнхүү нүхэн гарц хэзээ баригдаж дуусах талаар холбогдох албаныхнаас лавлахад, “нүхэн гарц болоогүй ээ” л гэсэн хариултыг өглөө. Ингээд ямартай ч энэ нь нийслэлийн нэгээхэн том бүтээн байгуулалт болох нь. Тэгвэл иргэдийн байр суурь ямар байна вэ? Нүхэн гарц энд байх нь хэр ашигтай вэ? Сансарын тунель орчмоор замын хөдөлгөөний ачаалал их ч явган хүний “ачаалал” их биш. Том худалдааны төв, дэлгүүр зам дагаж байрладаггүй. Ямар III, IV хорооллын зам биш. Түүгээр бол замын хоёр талаас гарах гэсэн хүмүүс, замын хөдөлгөөний ачаалал, автомашины зогсоол гээд бум бужигнасан газар. Тэнд л нүхэн гарц ашгаа өгөх байлтай. Харин сансарын тунелийн нүхэн гарц байсан байгаагүй зүгээр алхаад өнгөрчихдөг газар ийм гарц ашиглалтанд орвол шатаар нь алхаж, орж гарч цагаа алдах нь юу л бол гэж иргэд шүүмжилж байна. Ниргэсэн хойно нь хашгирав гэгчээр эцэс сүүлд нь хэлээд нэмэргүй ч цаашдаа аль хэсэгт юу үр ашигтай юм гэдэг дээр анхаармаар юм.