Монголын оюун ухааны академийг үүсгэн байгуулж, олон шилдэг залуусыг оюунлиг амьдралд “уруу татаж” чадсан энэ залуу үе тэнгийнхнийхээ бахархал юм. Х.Хатанбаатар өдгөө сайн шавь нар төрүүлж, монгол залуус тэднийг дуу нэгтэй дэмждэг болжээ.

Хаа ч явсан рубик шооны дасгалаа базааж явдаг оюунлаг залууг реппэр Gee нарын олон залуус бүчин зогссон нь учиртай. Тэд Х.Хатанбаатарыг “Оддын лиг” сагсан бөмбөгийн шоунд оролцож байхад нь ийн “олзолжээ”. Харахгүйгээр рубик шоо эвлүүлэх эсэхийг нь шалгаж үзэх гэсэн нөхдүүд нүднийх нь өмнө цамц барьж зогсоод оюун ухааны мастерыг ийн сорьж амжив.

Сорилт амжилттай шүү. Х.Хатанбаатар ердөө хэдхэн хоромд рубик шоог эвлүүлж, сагсны тэмцээн дундуур өөр бас нэгэн тэмцэлд ялалт байгуулж гайхашруулна лээ.