Монгол Улсын Үндэсний аюулгүй байдлын зөвлөлийн нарийн бичгийн дарга Ц.Энхтүвшин тэргүүтэй төлөөлөгчид 2012 оны 10 дугаар сарын 20-29-нд Израиль, Франц, Польш Улсад албан ёсны айлчлал хийв.

Айлчлалын үеэр Израиль Улсын Батлан хамгаалахын сайд Эхуд Барак, ҮАБЗ-ийн Ерөнхий нарийн бичгийн дарга Яков Амидрор, Гадаад хэргийн дэд сайд Дэни Аялон, Батлан хамгаалахын Төрийн нарийн бичгийн дарга Амос Гилад нартай уулзаж, хоёр орны гадаад бодлого, аюулгүй байдлын чиглэлээр санал солилцож, цаашдын хамтын ажиллагааны талаар ярилцан тохиролцов. Айлчлалын хүрээнд хоёр ҮАБЗ хооронд хамтын ажиллагааны протоколд гарын үсэг зурж, Батлан хамгаалах яам хооронд хамтарсан тунхаг бичиг байгуулав.

ҮАБЗ-ийн нарийн бичгийн дарга Ц.Энхтүвшин Франц Улсад 2012 оны 10 дугаар сарын 26-28-нд айлчилж, Францын Үндэсний Батлан хамгаалах, аюулгүй байдлын Ерөнхий нарийн бичгийн дарга Франсиз Дэлонтой уулзаж хоёр орны аюулгүй байдлын чиглэлээр харилцан сонирхсон асуудлаар санал солилцож, цаашдын хамтын ажиллагааны талаар ярилцан тохиролцов.

Төлөөлөгчид БНПУ-ын Үндэсний аюулгүй байдлын товчооны нарийн бичгийн дарга Станислав Кожейн урилгаар 10 дугаар сарын 29-нд Польш Улсад айлчлал хийв. Айлчлалын хүрээнд нарийн бичгийн дарга нар ганцаарчилсан болон өргөтгөсөн уулзалт хийж, Монгол Улсын Үндэсний аюулгүй байдлын зөвлөлийн Ажлын алба, БНПУ-ын Үндэсний аюулгүй байдлын товчоо хоорондын хамтын ажиллагааг хөгжүүлэх талаар ярилцаж, зарим тохиролцоонд хүрсний зэрэгцээ хоёр орны үндэсний аюулгүй байдал, стратегийн төлөвлөлтийн салбарын шинэчлэл, терроризмын эсрэг тэмцэл, Төв Ази болон Зүүн Европын бүс нутгийн улс төр, нийгэм, эдийн засгийн өөрчлөлт зэрэг асуудлаар харилцан санал солилцов. Ярилцаж, санал солилцсон асуудлуудыг цаашид хэрэгжүүлэх үүднээс нарийн бичгийн дарга нар хоёр байгууллагын хооронд хамтран ажиллах тухай санамж бичигт гарын үсэг зурав.