УИХ дахь намын бүлгүүд даваа гариг бүр хуралддаг уламжлалтай. Энэ дагуу Ардчилсан намын бүлгийн хуралдаан 10.00 цагаас “А” танхимд, МАХН-МҮАН-ын “Шударга ёс” эвслийн бүлгийн хуралдаан 09.30 цагаас “В” танхимд тус тус хуралдана. Мөн Монгол ардын намаас сонгогдсон гишүүдийн хуралдаан 10.00 цагаас “Б” танхимд хуралдах ажээ.

Мөн өнөөдөр ажлын хэсгүүд хуралдана. “Төрөөс мөнгөний бодлогын талаар 2013 онд баримтлах үндсэн чиглэл батлах тухай” Улсын Их Хурлын тогтоолын төслийг хэлэлцүүлэгт бэлтгэх үүрэг бүхий Эдийн засгийн байнгын хорооны Ажлын хэсгийн хуралдаан 14.00 цагаас “А” танхимд, Иргэний эрүүл мэндийн даатгалын тухай /Шинэчилсэн найруулга/ болон дагалдах бусад хуулийн төслүүдийг хэлэлцүүлэгт бэлтгэх үүрэг бүхий Нийгмийн бодлого, боловсрол, соёл, шинжлэх ухааны байнгын хорооны Ажлын хэсгийн хуралдаан 14.00 цагаас “В” танхимд,  мэдээллийн эрх чөлөөний тухай хуулийн төслийг хэлэлцүүлэгт бэлтгэх үүрэг бүхий Төрийн байгуулалтын байнгын хорооны Ажлын хэсгийн хуралдаан 15.00 цагаас “Б” танхимд,  Олон нийтийн радио, телевизэд зарим хуулийн хэрэгжилттэй танилцах Төрийн байгуулалтын байнгын хорооны Ажлын хэсгийн үйл ажиллагаа үргэлжлэх юм байна.