УИХ дахь МАН-ын гишүүн У.Хүрэлсүх УИХ-ын гишүүнээс чөлөөлөгдөх хүсэлтээ өнгөрсөн баасан гаригт УИХ-ын даргад өргөн мэдүүлсэн билээ. Тиймээс эл хүсэлтийг маргааш УИХ дахь намын бүлгүүд хэлэлцэхээр болсон байна. Харин мягмар гаригт эл асуудлыг УИХ-ын Төрийн байгуулалтын байнгын хороогоор хэлэлцэх бол пүрэв гариг буюу арваннэгдүгээр сарын 8-нд чуулганы нэгдсэн хуралдаанаар хэлэлцэн шийдвэрлэхээр болжээ.

УИХ-ын гишүүний бүрэн эрхээсээ сайн дураар чөлөөлөгдөх хүсэлт гаргаад байгаа У.Хүрэлсүх нь өргөдөлдөө “Ар гэрийн шалтгааны улмаас ийм шийдвэр гаргалаа” гэж байгаа ч цаад талдаа давхар бас шалтгаан нөлөөлсөн тухай ч хэвлэлүүд бичих болов. Тухайлбал, 2012 оны УИХ-ын сонгуулийн үеэр МАК-аас 600 сая төгрөгийг авлига хэлбэрээр авсан байж болзошгүйн зэрэгцээ Шивээ-Овоогийн уурхайн хууль бус өмчлөлийн маргаан нь Авлигатай тэмцэх газарт дуудагдахад хүргэсэн тухай онцолжээ.