Хятадын коммунист нам /ХКН/-ын ээлжит 18 дугаар их хурал зургаа хоногийн дараа эхлэх гэж байна. Дэлхий нийтийн анхаарлын төвд байгаа уг их хурлын оршил болох ХКН-ын Төв хорооны VII бүгд хурал өндөржүүлсэн аюулгүй байдал дор ажлаа эхлүүлсэн байна. Хурлаар ХКН-ын 18 дугаар их хурлын товыг албан ёсоор зарлах ажээ.Эрх баригч намын их хурал болох гэж байгаатай холбогдуулан Бээжин хотод онц байдал сахиж эхэлжээ. Бээжин хот энэ арваннэгдүгээр сарын 16-ныг дуустал онцгой бэлэн байдлын дэглэмд шилжсэн байна. Бээжингийн төв хэсэг, Тянь Ань Миний талбай, түүний зэргэлдээх дүүргүүдэд нийгмийн хэв журмыг сахиулах нэмэлт арга хэмжээ авчээ.
Бүгд хурлаар ХКН-ын Төв хорооны тайлангийн төслийг хэлэлцэх бөгөөд БНХАУ-ын дарга, ХКН-ын ерөнхий нарийн бичгийн дарга Ху Жинтао үг хэлэх юм байна.
Удахгүй болох ХКН-ын их хурлаар намын удирдлагуудыг шинээр сонгож, 2013 оны гуравдугаар сард болох Бүгд Хятадын Ардын төлөөлгчдийн Их Хурал буюу парламентдаа танилцуулах юм. БНХАУ-ын дарга, ХКН-ын Төв хорооны ерөнхий нарийн бичгийн даргаар Си Жиньпин, БНХАУ-ын Төрийн зөвлөлийн даргаар Шадар сайд Ли Кэцяныг томилох магадлал өндөр байгаа юм.
