УИХ-ын чуулганы үдээс хойшхи хуралдаан эхэлж, Ерөнхий сайд Н.Алтанхуяг мэдээлэл хийлээ. Монгол Улсын Засгийн газраас гол нэрийн бараа бүтээгдэхүүний үнийг тогтворжуулах чиглэлээр таван төрлийн хөтөлбөр хэрэгжүүлж эхэлсэн байна. Нэгдүгээрт, махны нөөц бүрдүүлж үнэ тогтворжуулах хүрээнд мах бэлтгэх компаниудад зээлээр дэмжлэг үзүүлэхээр болсон. Өнгөрсөн зургаан жилийн хугацаанд махны нөөцийг бүрдүүлэх хүрээнд шаардагдах хөрөнгийн эх үүсвэрийг нийслэлийн төсөвт суулгаж өгдөг байсан. Энэ хүрээнд 2012 оны төвшинд 12 мянган тонн мах нөөцөлсөн. Харин мах нөөцөлсөн компаниудад нэг кг мах тутамд 800 төгрөгийн урамшуулал олгож ирсэн. Нийт 9.6 тэрбум төгрөг төсөвт суулгасан байх жишээтэй. Гэвч мах бэлтгэх тогтолцоонд гажуудал үүссэнээр мах бэлтгэдэггүй компаниуд урамшуулал хүртсэн ноцтой зөрчил гарчээ. Тухайлбал, хойд хөрш рүү мах экспортлодог компаниуд хүртэл зоорин дахь махаа үзүүлж урамшуулал авсан байх жишээтэй. Тиймээс ийм зөрчил дахин гаргуулахгүйн тулд тодорхой тооны зооринд мах нөөцлөх хөтөлбөр хэрэгжүүлэхээр болжээ. Үүнд нийт 67 тэрбум төгрөг зарцуулахаар төлөвлөсөн байна.

Хоёрдугаарт, гурилын үнийг тогтворжуулах хүрээнд Үйлдвэр, хөдөө аж ахуйн яам нь гурил үйлдвэрлэгч компаниудтай гэрээ байгуулсан. Гурил үйлдвэрлэгч компаниуд нэгдүгээр зэргийн гурил 1 кг-ыг нь 550 төгрөгөөс дээш үнээр худалдахгүй. Гурил үйлдвэрлэгч компаниуд ийм үүрэг хүлээснээр компаниудаас худалдан авсан улаан буудайг нь барьцаалан зээл олгоно.

Хүнсний ногооны үнийг тогтворжуулахын тулд зоорь барих аж ахуйн нэгж, хувь хүнд хөнгөлөлттэй зээл олгоно. Ингэхдээ Улаанбаатар хотын ойролцоо эрчимжсэн аж ахуй байгуулахад Засгийн газар хөнгөлөлттэй зээл олгох чиглэлээр дэмжлэг үзүүлнэ, хөрөнгийг 100 орчим тэрбум төгрөг байхаар тооцжээ.
Засгийн газраас хэрэгжүүлж байгаа удаах хөтөлбөрт нефтийн бүтээгдэхүүний үнийг тогтворжуулах тухай багтжээ. ОХУ нефтийн бүтээгдэхүүнийхээ экспортын татварыг нэмэх бүрийд Монгол Улсад энэ төрлийн бүтээгдэхүүний үнэ өсдөг. Нөгөөтэйгүүр, валютын ханшийн өсөлтөөс шалтгаалж нефтийн бүтээгдэхүүний үнэ өсдөг тул Засгийн газар, Монголбанк хамтарч энэ тал дээр тодорхой хөтөлбөр хэрэгжүүлэхээр болсон. Мөн нефтийн бүтээгдэхүүний нөөц бүрдүүлэх нь чухал гэж үзсэн. Нөөц бүрдүүлэх замаар нефтийн бүтээгдэхүүний үнийг тогтворжуулах боломжтой хэмээн тооцжээ. Тиймээс энэ хүрээнд 167 тэрбум төгрөг зарцуулахаар төлөвлөжээ.

Энэ чиглэлээр авах хоёр дахь арга хэмжээ нь дотооддоо нефтийн үйлдвэр байгуулахад Засгийн газар анхаарч ажиллана. Өнгөрсөн хугацаанд УИХ, Засгийн газраас нефтийн үйлдвэр байгуулах чиглэлээр нэлээд ажил эхлүүлсэн, түүнд үндэслэж төрийн тодорхой оролцоотой нефтийн үйлдвэр байгуулах нь зөв гэсэн шийдэлд шинэчлэлийн Засгийн газар хүрчээ. Ингэхдээ нэг сая тонноос илүүтэй нефть боловсруулах үйлдвэр байгуулсан цагт эдийн засгийн үр ашиг талаасаа баланс барина гэсэн эрдэмтдийн судалгаа гарсан тул үүнийг барьж ажиллах юм байна.

Тав дахь хөтөлбөр нь Замын-Үүд боомтод төвлөрч байгаа төмөр замын ачаа эргэлтийн хурдыг сайжруулахын тулд “Улаанбаатар төмөр зам” хувь нийлүүлсэн нийгэмлэгийг вагон худалдан авахад Засгийн газар дэмжлэг үзүүлэхээр болжээ. Мөн хоёр тал асуудлыг ярилцсаны үндсэн дээр 24 цагийн дотор 9000 тонн ачаа Замын-Үүдээс-Улаанбаатар хотод төмөр замаар тээвэрлэгдэж ирдэг байхаар энэ талын ажил эхлүүлсэн тухай мэдэгдлээ.