Олон улсын хөлбөмбөгийн холбоо FIFA-гаас 4 жил тутам зохион байгуулдаг футзалын ДАШТ-ий нээлт урд шөнө болж эхний тоглолтууд явагдаж өндөрлөлөө.

2012 оны Футзалын ДАШТ Тайланд улсад зохион байгуулагдаж байгаа бөгөөд 6 хэсэгт Дэлхийн шилдэг 24 баг өрсөлдөж байгаа юм.

Урд шөнө А болон С группийн эхний тоглолтууд явагдсан. А группт тэмцээнийг зохион байгуулагч Тайландын шигшээ баг нутаг дээрээ Коста Рикагийн шигшээг 3:1 харьцаагаар хожсон бол, А группийн өөр нэгэн тоглолт болох Украйн, Парагвайн шигшээ багуудын тоглолт 3:3 харьцаатай тэнцээгээр өндөрлөлөө.

С группт Футзалын ДАШТ-ий 4 удаагийн аварга Бразилийн шигшээ баг Японы шигшээ багийг 4:1 харьцаагаар хожлоо. Бразилчуудаас Wilde дубль хийж, Neto, Vinicius нар мөн гоолдсон бол Японы шигшээгээс Kotaro Inaba гоолдсон байна. С группийн нөгөө тоглолт болох Португал, Ливийн шигшээ багуудын тоглолт 5:1 харьцаатай Португалчуудын ялалтаар өндөрлөсөн.