Догшин хар салхи Сэнди АНУ-ын зүүн эргийн нутгуудыг дайран өнгөрөхдөө хүн ам шигүү суурьшсан томоохон хот, мужуудад асар хэмжээний хохирол, гамшиг дагуулаад буй билээ. Хэдийгээр хар салхины аюул ард хоцорсон ч сүүлд гаргасан мэдээллээр амь үрэгдсэн иргэдийн тоо нэмэгдсээр 80-д хүрч,  хохирлын мөнгөн дүн ч өссөөр байгаа гэнэ. Цаашид хохирлын хэмжээ улам бүр нэмэгдэх төлөвтэй байна. Мөн хар салхины улмаас цахилгааны шон, шугам сүлжээнд гэмтэл гарснаар 12 мужийн 4.5 сая гаруй хэрэглэгч гэрэл, цахилгаангүй болж, олон сая айл, өрхийн гэр үерт автаж, эвдэрч сүйрчээ. Хохирлын дүнг одоогоор 50 тэрбум ам.доллар гэж тооцоолж байна. Гэхдээ энэ нь зөвхөн урьдчилсан тооцоо билээ.

Хар салхины гамшгаас үүссэн үерийн улмаас Нью-Йоркийн шатахуун түгээх газруудын 50 хувь нь хаалгаа бариад байгаа бол Нью-Жерсид 80 хувь нь хаагджээ.

Сэнди хар салхи Америкийг дайран өнгөрсний дараагийн өдрөөс гамшигт өртсөн муж, хотуудыг сэргээн засах, хохирлыг арилгах, хүмүүсийг аварч, эрж хайх ажиллагааг эхлүүлсэн байна. Хар салхины гамшгийг арилгах ажлын хүрээнд  Нью-Йоркийн хязгаарлагдмал метроны үйлчилгээ өчигдрөөс хэвийн ажиллагаандаа ороод байгаа бол өмнөд хэсгийн долоон метроны дөрөв нь үерийн усанд автсан хэвээр байгаа аж. Гэхдээ галт тэрэгний үйлчилгээ хэвийн ажиллагаандаа эргэн оржээ. Мөн авто замууд үерт автаж, эвдэрч гэмтсэн байгаа учраас авто тээврийн үйлчилгээ боогдсон хэвээр байна.