Даамчид ирэх сард тун завгүй байх бололтой. Учир нь, ирэх сарын 8-10-ны өдрүүдэд блиц болон рапид тоглолтын 2012 оны улсын аваргын шувтрагын шувтаргын шатны тэмцээн болох гэж байна. Тэмцээн “Хос мастер” клуб дээр юм. Үүний дараа даамчид ирэх сарын 20-25-нд Малайзын Куала-Лумпур хотноо зохиогдох Ази тивийн аварга шалгаруулах тэмцээнд оролцоно. Тав дахь удаагаа зохиогдох тус тэмцээнд манай улсаас гадна БНХАУ, Узбекистан, Казахстан, Лаос, Энэтхэг, Малайзын даамчид өрсөлдөх бөгөөд дэлхийн аваргад оролцох тамирчдыг эндээс шалгаруулах юм. Дашрамд сонирхуулахад, манай даамчин их мастер, гавьяат тамирчин  Д.Эрдэнэбилэг тивийн аваргаас дөрвөн алт (1999, 2001, 2003, 2010), их мастер Г.Ганжаргал мөнгө (2003), олон улсын мастер О.Түвшинболд хүрэл (1999), дэлхийн даамын холбооны мастер Р.Манлай хүрэл (2010) медаль тус тус хүртэж байжээ.