БНСУ-ын “Нонг шим” үйлдвэрийн бэлэн гоймонд хорт хавдар үүсгэгч бодис зөвшөөрөгдсөн хэмжээнээс их агуулагдсан байж болзошгүй гэсэн мэдээллийн мөрөөр Шударга өрсөлдөөн, хэрэглэгчийн төлөө  газраас “Нонг шим” нэрийн бэлэн гоймонг худалдаалахыг хориглож, “Нарантуул” олон улсын худалдааны төв, “Баянзүрх”, “Барс импекс”, “Хар хорин” зэрэг зах, худалдааны төвүүд, “Алтан жолоо групп” ХХК, “Грийн сити” ХХК, “Макс хүнс” ХХК, “Боса” ХХК, “Монгол саплэй чэйн” ХХК зэрэг аж ахуйн нэгжүүдийн сүлжээ дэлгүүрүүдээр энэ төрлийн бэлэн гоймонг худалдаалж байсныг зогсоосон.

Мөн эдгээр бүтээгдэхүүнд нарийвчилсан шинжилгээ хийлгэж байгаа гэж бид мэдээлсэн. Тэгвэл Мэргэжлийн хяналтын ерөнхий газрын төв лабораторид бүтээгдэхүүнд агуулагдах бензо-/а/-прины хэмжээг тодорхойлох техникийн боломжгүй гэсэн хариуг ирүүлсэн байна.

БНСУ-ын Хэрэглэгчийн болон Хүнс ба эмийн хяналтын байгууллагад хандсан бөгөөд эдгээр газруудаас ирүүлсэн албан ёсны дүгнэлтээр доорхи зургаан нэрийн бүтээгдэхүүнд дээрхи бодисын агууламж өндөр байгаа нь тогтоогдсон аж. Үүнд.

1. NONGSHIM NEOGURI (HOT),
2. NONGSHIM NEOGURI (HOT) MULTI,
3. NONGSHIM NEOGURI (MILD),
4. NONGSHIM BIG BOWL NOODLE SHRIMP,
5. NONGSHIM SAENGSAENG UDON BOWL NOODLE,
6. NONGSHIM SAENGSAENG UDON

Иймээс эдгээр нэр төрлийн бүтээгдэхүүнийг зах зээлээс татан авч, худалдаалахыг хориглохоор Шударга өрсөлдөөн, хэрэглэгчийн төлөө газраас шийдвэрлээд байна.