Саудын Арабын Айн Бадр гэх нэгэн тосгонд дурлалт хосуудын хуримын ёслолын үеэр өндөр хүчдэлийн шон унаснаас гал гарч, олон хүн нас барсан эмгэнэлт явдал болжээ. Энэхүү ослын улмаас хосуудын хуриманд уригдсан 25 зочин нас барж, 30 хүн гэмтэж бэртсэн байна. Хохирогчдын ихэнхи нь эмэгтэйчүүд байсан бөгөөд бэртсэн хүмүүсийг яаралтай орон нутгийн эмнэлэгт хүргэжээ. Гэрчүүдийн яриагаар хашаанд байсан цахилгааны шон унах үед оч үсэрч, богино хугацаанд гал дүрэлзсэн байна. Мөн өндөр хүчдэлийн шон унасны улмаас тасарсан цахилгааны утас хашааны төмөр хаалганд хүрснээс болж олон хүн өндөр хүчдэлд цохиулан нас баржээ.