Хөгжмийн ертөнцийн супер оддын нэг дуучин Николь Шерзингер “VH1” телевизийн “Behind the Music” нэвтрүүлэгт оролцож, удаан хугацаанд шаналсан хэцүү өвчнийхөө тухай ярьсан байна. Гоолиг сайхан биеэрээ эрчүүдийн харааг булаадаг алдарт дуучин Николь Шерзингерийг өлсөх өвчнөөр найман жилийн турш шаналсан гэхийг сонсоод ихэнх хүн мэл гайхах биз.

Николь Шерзингер найман жилийн турш өлсөх өвчинтэй тэмцэхийн тулд өдөр бүр өөртэйгөө тэмцэлддэг байсан бөгөөд энэ тухай хүмүүст ярьж байгаагүй гэнэ. Тиймдээ ч тэрээр маш их ганцаардаж, шаналдаг байжээ. Хэдийгээр Николь Шерзингер “Pussycat Dolls” хамтлагт байсан боловч хамтлагийн охиддоо өвчнийхөө тухай огтхон ч дурсаагүй гэнэ.  Өвчнөөсөө маш их ичдэг байсан учраас хүмүүст хэлдэггүй байсан ч өдгөө энэ өвчнийг ялж чадсандаа баяртай байдаг гэнэ. Николь Шерзингер “Би өлсөх өвчнөөс болж өөртөө дургүй хүрч, ичиж, өөрийгөө маш их үзэн яддаг байсан. Их ч ганцаардсан. Би өвчнийхөө тухай хүнд хэлэхээс ичдэг байсан учраас урьд нь хэзээ ч энэ тухай ярьж байгаагүй. Бас би өөрийгөө хохирогч мэтээр бодохыг хүсээгүй учраас өвчнийхөө тухай гэр бүлийнхэндээ хэлж, тэдний сэтгэлийг өвтгөхийг хүсээгүй. Надад маш хэцүү байсан ч би ерөөсөө өвчнийхөө эсрэг эм хэрэглэж байгаагүй. Зөвхөн өөрийнхөө хүчээр үүнийг ялахыг хүссэн, ялж ч чадсан.” гэж ярьсан байна. Мөн тэрээр “Өлсөх өвчин бол миний дон, өөрийгөө өвтгөх бол миний муу зуршил” гэжээ.

Дашрамд дуулгахад, Николь Шерзингерийн оролцсон тус шоу ирэх ням гаригт орон нутгийн цагаар 21.00 цагаас “VH1” телевизээр гарах юм байна.