Монгол улсын хөнгөн үйлдвэрлэлийн салбарын ууган нь болох орчин цагийн хэвлэх үйлдвэр үүсч хөгжсөний 100 жилийн ой энэ онд тохиож байна. Энэхүү ойг   Монголын хэвлэлийн үйлдвэрүүдийн холбоо ОЮУНЫГ БАРЛАСАН ОН ЖИЛҮҮД уриатай угтаж,  өнөөдөр салбарын ахмадууд, ажилчдаа хүлээн авлаа. Баярын хурлыг тус холбооны Тэргүүн Д.Ганбат нээж, салбарын хөгжлийн талаар илтгэл тавьсан байна. Дашрамд дуулгахад Монголын хэвлэлийн үйлдвэрүүдийн холбооны Хүндэт ерөнхийлөгчөөр УИХ-ын Гишүүн Н.Энхболд үүссэн цагаас нь одоог хүртэл ажиллаж байгаа аж. Хэвлэлийн технологич мэргэжилтэй түүнийг Засгийн газрын тогтоолоор хэрэгжүүлж байгаа хэвлэлийн хөтөлбөр боловсруулахад мэргэжлийн хувьд ихээхэн хувь нэмэр оруулсан гэж  салбарынхан үнэлдэг юм байна.

 Мөн баярын хуралд Үйлдвэр хөдөө аж ахуйн дэд сайд Д.Цогтгэрэл болон албаны төлөөлөгчид оролцсон байна. Энэ үеэр холбооныхон дэлхийн стандартад нийцсэн, дотоодын хэрэгцээг бүрэн хангасан, экспортод чиглэсэн хэвлэлийн үйлдвэрлэл, үйлчилгээг хөгжүүлэх зорилт тавин ажиллаж буйгаа танилцууллаа. Түүнчлэн  хэвлэлийн үйлдвэрлэлийн парк байгуулах, салбарынханд нэн тулгамдсан асуудал, хэвлэлийн мэргэжилтэй ажилтан дутагдалтай байгаад анхаарч, холбооны дэргэд сургалтын төв байгуулах зэрэг ажлыг хэрэгжүүлэхээр салбарын сайддаа төсөв төлөвлөгөөгөө танилцуулжээ.

Баярын хурлын үеэр Монголын хэвлэлийн үйлдвэрүүдийн холбооны гишүүн байгууллагууд хэвлэлийн салбарын түүхэн хөгжлийг харуулсан “Хэвлэл 100” бүтээлийн үзэсгэлэн гаргасан байна. Үзэсгэлэнд анхны хэвлэлээс эхлээд 5С 6С бүхий сүүлийн үеийн технологиор хэвлэгдсэн бүтээгдэхүүн тавигджээ.  Мөн энэ үеэр 

ОЮУНЫГ БАРЛАСАН ОН ЖИЛҮҮД баримтат кино, салбарын ажилчид болон урлагийнханы хамтарсан Хүндэтгэлийн концерт болж, ойн медалиар салбарын сайд,  ахмадуудаа шагнасан байна.