Улс оронд тулгамдаж буй олон асуудал, тэр дундаа шударга ёс тогтоох, хүнлэг энэрэнгүй нийгмийг цогцлоох, эх орныхоо баялагт монголчууд өөрсдөө эзэн суух гарцыг ард иргэдтэйгээ хамтран олох зорилгыг өмнөө тавьсан Ард түмний шударга их хуралдайг дөрөв дэх удаагаа  зохион байгуулах гэж байна. Энэ удаагийн Ард түмний шударга их хуралдайг маргааш буюу аравдугаар сарын 27-ны 10.00-18.00 цагийн хооронд АСА циркт, 28-нд МАХН-ын төв байранд тус тус  зохион байгуулах ажээ.

Ард түмний шударга их хуралдайд МАХН, МҮАН, Монголын Ардчилсан Хөдөлгөөний нам,  Монголын Либерал нам  гэсэн дөрвөн нам, Эрс шинэчлэл хөдөлгөөн, Тусгаар тогтнол эвсэл,  Цөмийн аюулгүй байдлын төлөө үндэсний хөдөлгөөн зэрэг 20 гаруй  иргэний нийгмийн  байгууллагын төлөөлөл,  гишүүд, дэмжигчдээс бүрдсэн  21 аймаг, нийслэлийн есөн дүүргийн  2000 гаруй төлөөлөгч оролцохоор болжээ.

Их хуралдайд УИХ-ын гишүүн, Засгийн газрын Шадар сайд Д.Тэрбишдагва, Эрүүл мэндийн сайд Н.Удвал, Байгаль орчин, ногоон хөгжлийн дэд сайд Б.Тулга нарын хүмүүс  илтгэл тавихаас гадна аймаг, дүүргийн төлөөлөл орон нутаг, дүүрэгт тулгамдаад байгаа асуудлуудаар үг хэлэх аж.