АНУ-ын 67 дахь Төрийн Нарийн бичгийн дарга, Хиллари Клинтон өнөөдөр 65 насыг зооглож байна. Тэрээр 1947 оны энэ өдөр Иллиной мужийн Чикаго хотод мэндэлжээ. Хиллари Клинтон өнөөдөр энэхүү баярт өдрөө хэрхэн тэмдэглэх талаар ямар нэгэн мэдээлэл хараахан гараагүй байгаа ч бусад хүмүүсийн адилаар найз нөхөд, гэр бүлийнхэнтэйгээ төрсөн өдрөө тэмдэглэн өнгөрүүлэх бизээ. Хиллари Клинтоныг нэртэй улстөрч гэдгээс гадна АНУ-ын 42 дахь Ерөнхийлөгч Уильям Жефферсон "Билл" Клинтоны гэргий гэдгээр нь хүмүүс сайн мэддэг. Тэрээр  1973 онд Йелийн Хуулийн сургуульд мэргэжил эзэмшсэн бөгөөд Америкийн хамгийн нөлөө бүхий 100 хуульчийн жагсаалтанд хоёр ч удаа орж байсан чадварлаг хуульч юм.