Нийслэлийн МАН /хуучнаар МАХН/ 2008 оны сонгуулийн дараах үймээн самууны үеэр намын байраа шатаалгаснаас болж Нийслэлийн өмчийн харилцааны газар болон Хүүхдийн төлөө газартай гурвалсан гэрээ байгуулж, Хүүхэд, залуучуудын ордны 1500 метр квадрат талбайг түрээсэлж байсан юм. Мөн 2010 онд түрээсийнхээ талбайг 2000 метр квадрат болгон томсгосон байна.

Улс төрийн үйл ажиллагаа явуулдаг нам эвслүүд нь төрийн болон орон нутгийн өмчийг ашиглах ёсгүй байдаг ч тухайн үеийн удирдлагууд энэ байранд түр "амьдрах" нөхцөлийг шийдэж чадсан юм. Нийслэлийн ЗДТГ-аас уг байрыг чөлөөлөхийг удаа дараа шаардсан тул тэнд үйл ажиллагаа явуулж байсан нийслэлийн МАН-ынхан хоёр хоногийн өмнө буюу  аравдугаар сарын 24-нд байрыг чөлөөлж, нүүжээ. Гэхдээ таван жил түрээсэлсэн байрныхаа төлбөрийг төлөөгүй явсныг холбогдох албаныхан хэллээ. Эх сурвалжийн мэдээллээр бол МАН-ынхан түрээсийн төлбөрт 513 сая орчим төгрөг төлөх ёстой байж.