УИХ-ын чуулганы нэгдсэн хуралдаанаар төсвийн хөрөнгө оруулалтын 5 хувийг Засгийн газар ямар нэгэн зориулалт заахгүйгээр төсөвт тусгах агуулга бүхий Төсвийн тухай хуульд нэмэлт, өөрчлөлт оруулах тухай хуулийн төслийг хэлэлцээд байнгын хороонд шилжүүллээ. Эл асуудлыг хэлэлцэн шийдвэрлэснээр УИХ-ын чуулганы нэгдсэн хуралдааныг өндөрлүүлээд байна.

Гэхдээ хэлэлцүүлгийн шатанд зориулалт заагаагүй хөрөнгө оруулалтыг төсөвт тусгах нь хууль зөрчсөн хэрэг болно гэсэн санал шүүмжлэл олонтаа өрнөсөн юм. Төсвийн хөрөнгө оруулалтын 5 хувийг хэмээн тооцохоор нийт 75 тэрбум төгрөгийг Засгийн газарт үлдээх бололцоо нээгдэж буй аж. УИХ-ын гишүүдийн хувьд УИХ-аас Засгийн газарт таван тэрбум ам.долларын үнэт цаас гаргах зөвшөөрөл олгочихоод байхад дээр нь нэмж 75 тэрбум төгрөгийг юунд зарцуулах нь тодорхойгүйгээр төсөвт суулгах нь буруу. Таван тэрбумын үнэт цаасаар Засгийн газар ямар ч ажил хийх бүрэн боломжтой хэмээн хэлж байлаа.