“Лондон 2012” олимпийн наадмын сэлүүрт завины төрөлд хүрэл медаль хүртсэн Их Британийн тамирчин Алекс Партриж болон хоккейчин Ханна МакЛеод нар олимпийн медалиудаа алджээ. Тэд өчигдөр өглөө Букингемийн ордонд Их Британийн хатан хаан II Элизабет,  Эдинбургийн гүн, хунтайж Филипп, Кембриджийн гүнгийн авхай Кэтрин, Ерөнхий сайд Дэвид Камерон, Их Британийн олимпийн тамирчдын багийн дарга болон бусад тамирчдын хамт баярын хүлээн авалтад оролцсон байна. Харин дараа нь тэд Мейферт нэгэн цэнгүүнд оролцож байхдаа олимпийн медалиудаа алдсан гэнэ.

Алекс Партриж “Лондон 2012” олимпийн наадмаас авсан хүрэл медаль, 2008 оны Бээжингийн олимпиос авсан мөнгөн медалиа савтай нь хулгайд алдсан байна. Тэрээр “Миний медалиудыг авсан хүн хурдан буцааж өгөөсэй гэж хүсч байна. Би үүний төлөө амьдралынхаа 12 жилийг зарцуулсан. Тиймээс надад хүнд цохилт боллоо” гэжээ. Алекс Партриж цэнгүүн дээр бүжиглэж байхдаа медалиудаа байхгүй байгааг анзаарсан ч бусад медальтнууд андуураад авсан байх гэж боджээ. Гэвч сүүлд нь түүнийг медалийг авсан хүн гарч ирээгүй байна. Одоогоор энэ хэргийг Лондонгийн цагдаагийн газраас мөрдөж байгаа аж. Харин медалиудаа алдсан Ханна МакЛеод болон Алекс Партриж нэр “Twitter” ,“Facebook” хуудсаараа дамжуулан гэмт хэрэгтэнд хандан хүч хөдөлмөрөө шингээж авсан медалиудыг нь буцаан өгөхийг гуйжээ.