Өнгөрсөн шөнө Аваргуудын лигийн A,B,C,D хэсгүүдийн 3-р тойргийн тоглолтууд амжилттай явагдлаа. Энэ өдөр Английн Арсенал болон Манчэстэр Сити, Испаний Реал Мадрид, Италийн АС Милан клубууд бүгд хожигдол хүлээн хөгжөөн дэмжигчидээ гонсойлгов.

А хэсэгт энэ зун олон наймааг хийн чадвартай тоглогчдыг эгнээндээ нэгтгэсэн ПСЖ клуб Динамо Загребыг Ибагимович болон Менез нарын гоолоор хожлоо. Харин Порто клуб Динамо Киевыг 3:2-н харьцаатай хожиж хэсгээ 9 оноотой тэргүүлж байна. Тэдний ард ПСЖ 6 оноотой, Динамо Киев 3 оноотой, Динамо Загреб оноо аваагүй явж байна.

В хэсэгт Английн Арсенал клуб талбай дээрээ Германы Шалькег хүлээн аван 2:0-н харьцаатай хожигджээ. Гоолуудыг 76 дахь минутад Хунтелаар, 86 дахь минутад экс Барса Афеллай нар оруулжээ. Ийнхүү хэсгийг Шальке 7 оноотой тэргүүлж, Арсенал 6 оноотой, Олимпиакос 3 оноотой ард нь бичигдэж эхэллээ.

С хэсэгт лигтээ тааруу амжилттай яваа АС Милан Испаний Малага клубын талбайд зочлон тоглож Хоакины оруулсан ганц гоолоор хожигдсон. Харин Халк тэргүүтэй Оросын Зенит клуб Андерлехтыг мөн адил 1:0-р буулган авлаа. Ингэснээр хэсгийг Малага 9 оноотой итгэл төгс манлайлж, АС Милан 4 оноотой, Зенит 3 оноотой тус тус ард нь бичигдэж байна.

Үхлийн D хэсэгт хамгийн өндөр чансаатай бичигдэж байгаа Реал Мадрид Германы Боруссия Дортмунд клубт 2:1-н харьцаатай хожигдлоо. Левандовски салхийг нээн, К.Роналдо тоог тэнцүүлсэн ч М.Шмельцер хожлын бөмбөгийг хийжээ. Харин Английн аварга Манчэстэр Сити Аяаксын талбайд зочлон тоглож 3:1-р ялагджээ. С.Насри 22 дахь минутад багтаа тэргүүллийг авчирсан ч 45,57,68 дахь минутад дараалан гоол алдсанаар хэсэгтээ 1 оноотой тун хүнд байдалд орж ирлээ. Тэдний дээр Аяакс 3 оноотой, Реал Мадрид 6 оноотой, Дортмунд 7 оноотой бичигдэж эхэлжээ.

Тоглолтуудын үр дүн:
Динамо Загреб 0:2 ПСЖ (A хэсэг)
Порто 3:2 Динамо Киев (A хэсэг)

Арсенал 0:2 Шальке (B хэсэг)
Монпелье 1:2 Олимпиакос (B хэсэг)

Зенит 1:0 Андерлехт (C хэсэг)
Малага 1:0 АС Милан (C хэсэг)

Аяакс 3:1 Манчэстэр Сити (D хэсэг)
Боруссия Дортмунд 2:1 Реал Мадрид (D хэсэг)