Нийслэл Улаанбаатар хот үүсч байгуулагдсаны 373 жилийн ойг тэмдэглэн өнгөрүүлэх ажлын хүрээнд нийслэлийн Архивын газраас “Нийслэлийн түүх-архивын баримтанд” сэдэвт архивын баримт, үзмэрийн үзэсгэлэнг аравдугаар сарын 25-30-нд Улаанбаатар хотын нийтийн төв номын санд зохион байгуулах гэж байна. Үзэсгэлэнгийн нээлт маргааш 11.00 цагт болох ажээ.

Нийслэлийн Архивын сан хөмрөгөөс дараах таван чиглэлээр баримт бичиг, үзмэрүүдийг дэлгэх юм. Үүнд:
 

•  “Нийслэл хотын захиргааны нэрийн өөрчлөлт, бүтэц, зохион байгуулалт”. 1924 оноос одоог хүртэлх нэрийн өөрчлөлт, бүтэц, зохион байгуулалтын шийдвэрүүд

• “Нийслэл хотын захиргааны үйл ажиллагаа”. 1924 оноос одоог хүртэлх үеийн баримт бичгүүд болох Хотын түр, жинхэнэ захиргааны дүрэм /1924/, Хороодын дагаж явах дүрэм /1924/, Хотын захиргаа, хороодын дарга нарын хамтарсан хурлын тогтоол /1924/, Хороодын дарга нарт модон тэмдэг олгосон бичиг, Хотын захиргаанаас явуулж байсан арга хэмжээнүүдийн зарлагын баримтууд /1924/, Хотын захиргааны болон хороодын албан хаагчдын цалингийн цэс, Улаанбаатар хотыг Сүхбаатарын одонгоор шагнасан тухай АИХ-ын тэргүүлэгчдийн зарлиг зэрэг сонирхолтой баримт бичгүүд

•  “Нийслэл хотын бүтээн байгуулалт, хот тохижилт”. Хотын анхны  хилийн цэсийн зураг /1929/, Харьяат иргэдийн хашааны хаалгыг дугаарлах модон пайз хийлгэх асуудлаар харилцсан бичиг /1924/, Хороодын газрын зураг /1931/,  Нисэх онгоц авах асуудлаар харилцсан бичиг /1924/, Ард иргэдээс өгсөн тусламжийн данс /1924/, Хот сайжруулах комиссын тогтоол /1924/, Улаанбаатар хотыг хөгжүүлэх ерөнхий төлөвлөгөө зэрэг баримт бичгүүдийг тайлбартайгаар байрлуулсан байна. Мөн  сэдвийн холбогдол бүхий кино, дүрс бичлэг

• “Нийслэл хотын иргэдийн ахуй амьдрал”. Ломбард хэмээх барьцаалан зээлдүүлэх газрын үүсэл, хөгжил /1924/, Хотын дотор уурын тэрэг хэрэглэн явагчдын дүрэм /1925/, Хотын иргэдийн үл хөдлөх хөрөнгийн бүртгэл /1924/, хотын дотор мод тарих, бие засах газрыг журамлах, мал нядлах, худаг малтах, хүүр оршуулах, худалдааг нүүлгэн шилжүүлэх, усан хөөрөг зэрэг асуудлаар  харилцсан бичгүүд /1924-1925/, Ой мод хамгаалах дүрэм /1924/ зэрэг баримт бичгүүдийг холбогдол бүхий кино, дүрс бичлэг

•  “Нийслэлийн хүн амын статистик тоон үзүүлэлт”. Хотын хүн амын тоо, өөрчлөлт хөдөлгөөн, иргэдийн дэлгэрэнгүй бүртгэл судалгаа, лам нарын болон сурагчдын бүртгэл зэрэг баримт бичгүүдийг дэлгэн тавих юм байна.

www.ulaanbaatar.mn