Нилээдгүй завсарласны эцэст Аваргуудын лигийн хэсгийн 3-р тойргийн тоглолтууд эхэллээ. Энэ өдөр E,F,G,H хэсгүүдийн тоглолт болсон юм. Байерн Мюнхэн клубийг эс тооцвол бусад топ багуудын хувьд тоглолт тун хүндхэн эхэлсэн. E хэсэгт Италийн аварга Ювентус Нордшьелленд клубтэй 1:1-р эвийн гэрээ байгуулсан бөгөөд тэнцээний гоолыг 81 дэхь минутад Вучинич оруулжээ. Харин сайн формтой байгаа Язгууртнууд Украйнд зочлон тоглож 2:1-н харьцаатай ялагдал хүлээлээ. 88 дахь минутад Оскар гоолдсон ч энэ нь хангалтгүй байлаа. Ийнхүү хэсгийг Шахтер 7 оноотой тэргүүлж, Чэлси 4 оноотой удаалж, Ювентус 3 оноотой ард нь бичигдэж байна.

F хэсэгт өнгөрсөн тойрогт Байерныг буулган авсан БАТЭ Борисов энэ удаад Валенсия клубт 3:0-р ялагдлаа. Тус тоглолтонд Солдадо хэт трик хийжээ. Байерн Мюнхэн Францын Лилль клубийг Т.Мюллерын ганц гоолоор ялалт байгууллаа. Одоогоор Лилль ганц ч оноо аваагүй бол бусад 3-н баг тус бүр 6 оноотой явж байна.

G хэсэгт Испаний Барсэлона баг талбай дээрээ тун хүндхэн ялалт авлаа. Тэд Шотландын Сэлтик клубт 18 дахь минутад гоол алдсан ч 45 дахь минутад А.Иньеста, 2-р хагасын шүүгчийн мэдлийн цагт Х.Альбагын оруулсан гоолын ачаар 3 оноогоо халаасаллаа. Харин Орост Спартак Москва Португалын Бэнфикаг 2:1-р буулган авжээ. Ийнхүү Барса 9 оноотой, Сэлтик 4 оноотой, Спартак Москва 3 оноотой, Бэнфика 1 оноотой бичигдэж байна.

H хэсэгт Манчэстэр Юнайтэд мөн адил гайхалтай эргэн ирэлтийг хийж чадсан юм. Дөнгөж эхний 20 минутад тэд талбай дээрээ 2:0-р хожигдож байлаа. Гэхдээ 25,75 дахь минутад Чичарито дубль хийн, 62 дахь минутад Эванс гоолдож амттай 3 оноо авлаа. H хэсгийг Английн баг 9 оноотой тэргүүлж байна.