Испанийн ла лигийн наймдугаар тойргын тоглолтын хүрээнд Барселона-Депортиво багууд хороондоо таарч 5:4-ийн харьцаагаар Барселона баг ялалт байгууллаа. Нийтдээ 9 гоол орсон гайхалтай тоглолтод Барсагийн сүүлийн гурван гоолыг, Аргентины легионер Месси оруулснаар багаа ялалтад хөтөлсөн байна.

Тито Вияановагийн баг тоглолтын эхний 18 минутад гайхалтай байж 3:0-ээр тэргүүлж эхэлсэн юм. Тоглолтын гурав дахь минутад Фабрегасын дамжуулалтаар Хорди Альба гоолдсон бол ердөө тавхан минутын дараа Мессигийн дамжуулалтаар Телло гоолдсон байна. Харин тоглолтын 18 дахь минутад Фабрегасын дамжуулалтаар Линонел Месси гоолдож тооны зөрүүг гурваар холдуулсан юм. Харин 26 дахь минутад Депортиво багийн Пицци 11 метрийн торгуулийн цохилтыг багтаа авчирч түүнийгээ чулуу болгосноор тооны харьцааг бага зэрэг ойртуулсан билээ. Үүнээс 11 минутын дараа Депорчууд дахин гоолдож тооны харьцааг 3:2 болгосон байна. Энэ удаад гоолыг Алекс Бергантинос оруулжээ. Эхний хагасын сүүлийн, тоглолтын зургаа дахь гоолыг 43 дахь минутад Барсагаас Месси оруулсан бөгөөд түүнд дамжуулалтыг мөн л Фабрегас өгчээ.

Тоглолтын хоёр дахь хагас эхлээд ердөө хоёрхон минутын дараа эзэн баг Депортиво багийн тоглогч Пицци хоёр дахь гоолоо оруулж тооны харьцааг 4:3 болгон ойртуулжээ. Пиццигийн гоолоос хойш Депортивогийн тоглолт сэргэсэн ч тэр болгон байндаа тусахгүй байв. Барса бөмбөгийг барьж байсан ч мөн л гоол болсонгүй. Гоолын оролдлогын хувьд Барса урьдын адил илүү байсан юм. Харин тоглолтын 77 дахь минутад Барсагаас Лионел Месси багийн тав дахь, өөрийнхөө гурав дахь гоолоо оруулж тоглолтын тооны харьцааг 5:3 болгосон байна. Харин эцсийн цэгийг Барсагаас тавьсан. Гэхдээ Хорди Альба өөрийнхөө хаалганд бөмбөг оруулж тооны харьцааг 5:4 болгож, үүнээс хойш хоёр баг гоолдсогүйгээр энэ тоглолт өндөрлөсөн юм.