Зохиолч Б.Шүүдэрцэцэгийн “Ану хатан” романаас сэдэвлэн бүтээсэн “Ану хатан” түүхэн уран сайхны кино өнөөдөр “Black Box” театрт албан ёсны трэйлерээ дэлгэх нь ээ.

Киноны үйл явдал, өрнөлөөс хамаарч зургийг дөрвөн улирал дамнан авахаар төлөвлөсөн. Киноны зөвлөх болон ерөнхий найруулагчаар ардын жүжигчин Г.Жигжидсүрэн, ерөнхий зураглаачаар Д.Ангараг, ерөнхий зураачаар Ж.Цог, ерөнхий продюсерээр Д.Болдхуяг нар ажиллаж байгаа юм. Ану хатны дүрд “Voice” группийн дуучин Д.Отгонжаргал, Галдан хаанд дуучин, жүжигчин М.Мягмар, Очирт цэцэнд ардын жүжигчин Г.Мягмарнаран, Юм-Агас хатанд гавьяат жүжигчин С.Сарантуяа, Мандарваад жүжигчин О.Долгор, Асралтад гавьяат жүжигчин Ж.Оюундарь, Данжила жанжинд жүжигчин Г.Ариунбямба нар тоглож байна. Кино зураг авалтын явцын талаар сонирхож зарим жүжигчинтэй нь уулзсан юм. Сэнгэ хааны том, бага хүү Цэвээнравдан, Сономравдан, Ахай хатны дүрд тоглож байгаа жүжигчин П.Баттөр, Л.Билэгжаргал, мисс Б.Бадамцэцэг нар тогложээ.

Энэхүү  уран бүтээл  “Мандухай цэцэн хатан”-аас хойш 29 жилийн дараа бүтээгдэж буй түүхэн хатны тухай хоёр дахь кино гэдгээс гадна эмэгтэй зохиолч, эмэгтэй ерөнхий найруулагч, эмэгтэй гол дүртэйгээрээ онцлог. “Тусгай салаа”-д Сүлдийн ээжид тоглосон жүжигчин найруулагч Т.Алтантуяа “Ану хатан”-ы ерөнхий найруулагчаар ажилласан юм.  Харин киноны хөгжмийг Америкт ажиллаж амьдарч буй С.Сансаргэрэлтэх бичиж байгаа ажээ. Тэрбээр энэ оны хамгийн том  түүхэн киноноос гадна “Гамлет” жүжгийн хөгжмийг бас бичиж байгаа гэнэ.