“Эрдэнэс Тавантолгой” ХК баруун Цанхид гэрээт олборлогчоор хамтран ажиллахаар урьсан “Пибоди Энержи”-тэй хэлэлцээ хийж эхлээгүй байна. Энэ долоо хоногт хэлэлцээгээ эхлүүлэхээр төлөвлөж, “Пибоди”-гийн захирлууд Улаанбаатарт ирээд байгаа ч “Эрдэнэс Тавантолгойн” шинэ захирал Я.Батсуурь Өмнгөговь руу ажлаар явсан байгаа юм байна. Компанийн шинэ удирдлага ажлын төлөвлөгөө, шинэ үүрэг өгтөл хэлэлцээ эхлэхгүй гэж эх сурвалж мэдээллээ.

“Эрдэнэс Тавантолгой” энэ сарын эхээр Баруун Цанхид уурхай нээснийхээ дараа АНУ-ын “Пибоди Энержи” компанийг гэрээт олборлогчоор хамтран ажиллах хүсэлт хүргүүлсэн. Баруун Цанхийн уурхайн болон дэд бүтцийн зохион байгуулалтыг хийж,  нүүрс олборлож эхлэснээр ажлын байр нэмэгдэж, нүүрснээс орлого олох эдийн засгийн чухал ач холбогдолтой учраас “Эрдэнэс Тавантолгой” “Пибоди Энержи”-д санал тавьсан юм.

Хэрэв “Пибоди”-той хэлэлцээ хийж, тохиролцоонд хүрч чадахгүй бол “Эрдэнэс Тавантолгой” дараагийн компанид санал тавих билээ.