УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаанаар Тамхины хяналтын тухай хуулийн төслийг хэлэлцлээ. Хэрэв хуулийг баталбал 2013 оны гуравдугаар сарын 1-нээс хэрэгжүүлж эхлэх юм. Тамхийг 21 нас хүрээгүй хүнд худалдахгүй, ерөнхий боловсролын сургуулийн орчноос 500 м-ээс дотогш газарт тамхи борлуулах цэг байрлуулахгүй, ой мод, ой хээрийн ил задгай газарт тамхи татахгүй, хуулийг зөрчсөн хувь хүнийг нэг сая, албан байгууллагыг гурван сая  төгрөгөөс эхлэн торгоно гэх зэрэг заалтыг Тамхины хяналтын хуулийн төсөлд тусгаад байгаа юм. Тамхи ширхэглэн зарж буй  иргэнийг нэг сая төгрөгөөр торгоно. Мөн баар, ресторан, ажлын байран дээрээ тамхи татахыг хориглоно гэх зэрэг заалтыг орууллаа. Хуулийн төслийг чуулганы нэгдсэн хуралдаанаар хэлэлцэх юм.

Мөн гишүүн С.Эрдэнэ Боловсролын салбарын ирэх оны төсвийн талаар танилцууллаа. Тэрбээр “Боловсролын салбарын зардал тогтмол нэмэгдэж байгаа. Сургууль, цэцэрлэгийн барилга, дотуур байр, спортын заалны барилгын хөрөнгө хэрэгтэй. Хүүхдэд чөлөөт цагийн орчныг бий болгох хэрэгтэй. Энэ чиглэлээр холбогдох арга хэмжээ авна” гэж байлаа. Энэ төрлийн объектуудын 15 хувьд нь мэргэжлийн хяналтын байгууллагаас ашиглах боломжгүй гэсэн дүгнэлт гаргажээ. Хүүхдэд аюулгүй орчин хэрэгтэй гэсэн үүднээс барилгуудыг шинээр яаралтай байгуулах хэрэгтэй болсон байна.

Гишүүн А.Тлейханы мэдээлснээр сургууль, цэцэрлэг, дотуур байр, биеийн тамирын заалны 1100 барилгад 1,2 их наяд төгрөг хэрэгтэй байгаа юм байна. Гишүүн Г.Уянга спортын заалны шалыг хальтирдаггүй зориулалтын материалаар хийх, гишүүн С.Дэмбэрэл дан төсвийн мөнгөөр гүйцэтгэхэд хүнд тул хувийн хэвшлээс хөрөнгө татах саналууд хэллээ. Эдгээр асуудлыг чуулганы нэгдсэн хуралдаанаар хэлэлцэх юм.