Засгийн газар харьяа агентлагуудынхаа тоог цөөлж, 43-аас 28 болтол нь бууруулсан. Энэ хэрээр зарим нэгэн нь ажлаа өгч, зарим нэгнийх нь ажлын чиг үүрэг өөрчлөгдөөд байгаа. Гэхдээ танил тал, арын хаалга, аав ээжийнхээ нэрээр ажилд орсон  олон хүнд “би одоо яах вэ” төрөөд буй биз. Төрийн алба бол үйлчилгээний байгууллага. Тэр утгаараа ч мэргэжлийн, мэргэжсэн, чадварлаг хүмүүс ажиллах ёстой. Тэгж байж л төр хүчирхэг, бас төрийн ажил урагштай байх юм. Хэний нэгнийг хахуульдаж, хэн нэгний татаас түлхээсээр төрд шургалсан нөхдүүд төрийн төлөө “оготно” мэт ажиллаж чадах болов уу.  Төрийн агентлагуудыг татан буулгах,    зарим дархлагдсан дарга нарыг халах солихтой зэрэгцэн, хууль бус  үйлдлүүд ч  газар аваад байна. Насаараа төрд хадагдаж, насаараа дарга хийх юм шиг загнаж, төрийн албыг хувийн компани шигээ ойлгож явсан нөхдүүд албан тушаалаасаа салангуутаа л  өөрсдийнхөө гар хөлийг төрийн албанд сэм шургуулах болсон гэнэ.  Хэрвээ хэн дуртай нь төрийн албыг хийчихдэгсэн бол өнгөрсөн хугацаанд Монголын төр шиг шударга, хүчирхэг төр байхгүй байсан биз.  Сүүлийн үед  ажлаас халагдсан, албаа өгсөн “дархлагдсан” дарга нар  туслахаа эсвэл жолоочоо төрийн албанд “дархалж” өгөөд л явах болсон гэх. Ийм  хэл ам ч гадуур тасрахгүй байна. Дуртай нэг нь  төрийн албан хаагч болдог, захын жолооч улсын байцаагч болчихдог иймэрхүү сайн дурынхнаар төрийн алба дүүрэх нь ээ, энэ янзаараа.  Зарим агентлаг, газрын дарга нар ажлаасаа халагдах шум сонсонгуутаа л өөрийнхөө гар хөл болсон туслахаа эсвэл жолоочоо төрийн албан шахсан байна. Тухайлбал, Улсын мэргэжлийн хяналтын ерөнхий газар байна.  Сүүлийн үед хөл толгой нь олдохгүй бужигнах болсон УМХЕГ мэргэжлийн байцаагч нар гэхээсээ илүү Р.Содхүүгийн гар хөл, танил тал найз нөхдөөр дүүрснийг тэнд ажиллаж байгаа хүмүүс нь хэлж ярьж буй юм.

Есдүгээр сарын 22-нд болсон Засгийн газрын хуралдаанаар Улсын мэргэжлийн хяналтын ерөнхий газрын дарга Р.Содхүү, Гадаадын иргэн харьяатын асуудал эрхлэх газрын дарга Д.Мөрөн нарыг үүрэгт ажлаас нь  чөлөөлсөн  юм.  Засгийн газрын тушаалаар халагдахаар болсон Р.Содхүү дарга өөрийнхөө жолооч н.Түмэнжаргал, туслан Н.Хулан нараа УМХЕГ-т улсын байцаагч болгох тушаал гаргасан нь тус газарт ажилладаг олон хүний дургүйцлийг төрүүлээд байгаа аж. Мэргэжлийнх нь  сургууль төгсч, номыг нь уншин, ногоотой шөлийг нь долоосон хүмүүс МХЕГ-т орж чадахгүй байхад Р.Содхүүгийн жолооч, туслах хоёр нь ногоон гэрлээр улсын байцаагч болсон шалтгааныг холбогдох газрууд нь тодруулах шаардлагатай болов уу. Хэн нэгэн даргын жолооч, туслах нь улсын байцаагч хийчихдэгсэн бол  төрийн албаны шалгалт шүүлэг авах ямар хэрэгтэй байна вэ. Улсын байцаагчийн үнэмлэхийг даргаараа далайлгаж, хууль бусаар өвөртлөөд буй н.Хулан гэгч эмэгтэй нь сувилагчийн мэргэжилтэй бөгөөд Р.Содхүүг Хөрөнгийн биржийн захирлаар ажиллаж байх үеэс л туслахыг нь хийдэг байсан гэх. Харин н.Түмэнжаргал Р.Содхүүг Хөрөнгийн биржийн захирлаар ажиллаж байх үеэс л  жолоочийг нь хийдэг байсан бөгөөд хувийн болоод хувьсгалынх нь элдэв ажилд зарагдаж явсныхаа төлөөсөнд өдгөө улсын байцаагч болтлоо суга дэвшжээ.  Яагаад Р.Содхүү ийнхүү туслах бүсгүйгээ, жолооч  залуугаа улсын байцаагч болгов оо. Үүний цаана ямар учир байна вэ. Тиймээс УМХЕГ-т ажиллаж байгаа хүмүүсээс мэргэжлийн болон мэргэшлийн шалгалт авах цаг болжээ. Хэн нэгэн даргын туслах, жолооч эсвэл эхнэрийн нь дүү, хамаатан садангаар төрийн алббг  дүүргэмээгүй байна. Гадаадын иргэн харьяатын асуудал эрхлэх газарт бас хууль бусаар ажил орсон нөхдүүдийн талаар хов жив жиргээд эхэлсэнийг холбогдох газрууд нь анхаараасай билээ. Төрийн албыг даргын ах дүүс, хамаатан садан, эхнэрийнх нь найз нөхөд, танил тал, туслах, жолооч нараас цэвэрлэхгүйгээр төрийн ажил хол явж чадахгүй байх.