Ямайкийн спринтер Усаин Болт дэлхийн хамгийн хурдан хүн гэх статусаас гадна олон нийтэд нээлттэй, хүмүүнлэгийн үйлст харамгүй оролцдог гэдгээрээ алдартай. Усаин Болт хэмээх хүмүүнлэгийн сан үүсгэн байгуулж, сайн үйл түгээх болсон тэрбээр алтан өнгөт автомашинаа дуудлагаар худалдаж, олсон орлогыг буяны үйлст зориулахаар болжээ. Японы авто үйлдвэрлэгч “Nissan Motors” компанитай хамтран ажилладаг Усаин Болт өнгөрөгч долоо хоногт арлын оронд зочилж, Йокохама дахь тус компанийн төв байранд саатжээ. Энэ үеэр “Nissan”-ы удирдлага түүнд зориулж, “MR BOLT” хэмээх тусгай загварын, алтан өнгөт төмөр хөлөг бүтээснээ танилцуулсан байна. “MR BOLT”-ыг eBay сайтаар дамжуулан онлайнаар үнэ хаялцуулах бөгөөд олсон орлогыг Ямайкийн хүүхэд багачуудын боловсрол, соёлын хүртээмжтэй байдлыг нэмэгдүүлэхэд зарцуулах гэнэ.

Домогт тамирчны гарын үсэг бүхий цор ганц энэхүү автомашины интерьер дизайнд ч мөн цэвэр алт ашиглан чимэглэсэн, өвөрмөц байдлаар хийсэн гэдгээ зохион бүтээгчид нь онцолжээ.