УИХ-ын гишүүн ҮХАА-н сайд Х.Баттулга өнөөдөр  салбарынхаа эрдэмтдийг хүлээн авч уулзан, үйлдвэрлэлийн салбарын судалгаа шинжилгээ, туршилт, шинжлэх ухааны хөгжлийн түвшин, гадаадын хөгжилтэй орнуудын туршилт, туршлага ололт нээлтийг хэрхэн нэвтрүүлж байгаа талаар нээлттэй ярилцлаа.

Уулзалтад ҮХАА-н дэд сайд Б.Цогтгэрэл, яамны ТНБД Х.Золжаргал болон ШУТИС-ийн Үйлдвэрлэлийн технологийн сургуулийн эрдэмтэн багш нар, Хими, химийн технологийн хүрээлэнгийн эрдэмтэд, ШУТИС-ийн Материалын технологийн сургуулийн эрдэмтэн багш нар гэх мэт 30 гаруй доктор, профессорууд оролцсон юм. Лабораторид туршаад үйлдвэрлэлд нэвтрүүлэхэд бэлэн болсон олон технелоги, туршилт байгааг эрдэмтэд сайдад танилцуулсан. Монгол Улсын Засгийн газар эрдэмтдийг дэмжиж байсан түүх байхгүй, үргэлж гадаадын төсөл хөтөлбөрт хандаж, тусламж авдаг, санхүүгийн дэмжлэг байхгүй хэцүү байна гэх тулгамдаж буй асуудлаа танилцуулж байлаа. 

ҮХАА-н сайд Х.Баттулга “Энэ Засгийн газар үйлдвэрлэлд ач холбогдол өгөөд аж үйлдвэрийн яам байгуулчихсан, та бүхэн тэр яаманд нь ирчихээд байна. Тийм учраас ажил хийгдэх нь тодорхой харин тэр ажилд хэрхэн гараа хөдөлгөж, яаж оролцох вэ гэдгээ ярилцъя” гэсэн саналыг эрдэмтдэд тавьсан юм. Мөн тэрээр онол, үйлдвэрлэл, эрдэмтдийн харилцан уялдаагүй байгаагаас ч нэлээд зүйл шалтгаалж байгааг онцлов.

Үйлдвэрлэлд нэвтрүүлэх боломжтой шинэ санаа, санаачилга, технологийг лабораторид туршсаны дараа үйлдвэрлэлд нэвтрүүлэхийн өмнө туршилтын үйлдвэрт заавал хэрэглэж дахин туршдаг дэлхий нийтийн жишгийг манай улс хэрэгжүүлдэггүй, туршилтын үйлдвэр байгуулах боломж байдаггүй гэдэг дээр тэдний санал нэгдсэн. Үүнийг шийдвэрлэж, туршилтын үйлдвэрүүд байгуулах санхүүгийн эх үүсвэр бий болгох талаар ч мөн ярилцсан юм.