Одоогоос бараг найман жилийн өмнө УИХ-ын гишүүн асан, дипломатч З.Саираан Кувейт улсаас Парламентын шинэ ордон барих зориулалтаар 10 гаруй тэрбум төгрөгтэй тэнцэх хөрөнгө оруулалт шийдүүлсэн юм. Гэвч мөнгө нь бэлэн ч газар олдохгүй байсаар өдийг хүрсэн. Энэ хооронд мөнгөний ханш унаж, мөнөөх мөнгө УИХ-д шинэ ордон барихад хүрэлцэхгүй тийшээ хандаж буй.

Ордныг Төрийн ордны арын цэцэрлэгийг нурааж оронд нь барина гэж нэг хэсэг шуугиад иргэд болоод УИХ дахь Ногоон бүлгийн тэмцлээр чимээгүй болсон. Нэг ч мод бут гэмтээлгүй “дүүжин” маягаар барина гэж хэсэг сурталчилсан. Мөн Их тэнгэрийн аманд, Яармагт, бүр болиод Дархан-Уул аймагт УИХ-ын ордныг барина гэж хэлэлцэж байгаад хоёр жилийн өмнөөс “мартсан” юм. Тэгвэл энэ асуудлыг ирэх долоо хоногт УИХ-аар сэргээн хэлэлцэх гэж байна.

Төрийн ордонд Монгол Улсын Ерөнхийлөгчийн Тамгын газар, Засгийн газрын Хэрэг эрхлэх газар, УИХ-ын гишүүд, Тамгын газар, үйлчилгээний албан хаагчид, харуул хамгаалалт гээд 1000 орчим хүн ажилладаг. Төрийн ордон ачааллаа даахгүй болж буй тул ийнхүү шинэ ордны барилгын ажлыг дахин ярихаар болжээ.