АНУ-ын Нью-Йорк хотын Манхэттен дэх Манзигийн сийлбэрийн дэлгүүрт хамт ажиллаж, найзлах болсон 74 настай Уилли МакПерсон болон 44 настай Кристофер Манзи нар 1987 оноос эхлэн долоо хоног бүр “Powerball and Mega Millions” тохирлын хонжворт сугалааг худалдан авч, эхэлжээ. Тэд нэг л өдөр азын од гийж, супер шагналын эзэн болно хэмээн итгэж байсан нь ийнхүү 25 жилийн дараа биелж, сугалаагаар 14 сая ам.доллар хожсон байна.

Аз дагуулсан сугалаа худалдан авах өдрөө МакПерсон Манзи найзаасаа 20 ам.доллар зээлж, өнөөх сугалаагаа Kyu’s кофе шопоос худалдан авч, суугаад хонжвороо тааруултал азтан болсон байна. МакПерсон супер шагналын эзэн болоод магнайгаа хагартал баярласан ч энэ тухайгаа маргааш нь найз Манзидаа дуулгажээ. Тэрээр Манзи дээр очоод хоёулаа “жекпот” хожчихлоо хэмээн хашгирах шахам хэлсэн байна.  Найзууд сугалаанаас хожсон мөнгөнөөсөө татвар төлөөд гар дээрээ 10 сая ам.доллар авчээ. Мөн жекпотын “алтан сугалаа” худалдаалсан Kyu’s кофе шопын эзэн 10 мянган ам.доллараар шагнуулсан байна.  Уилли МакПерсон, Кристофер Манзи нар өнгөрсөн 25 жилийн турш тасралтгүй долоо хоног бүр 40 ам.доллараар хонжворт сугалаагаа худалдан авдаг байжээ.