Нийслэлийн прокурорын газрын орлогч Ё.Сагсайн мэдээлсэн “Мянганы сорилтын сангийн Цэвэр агаар төслийн санхүүжилтээс нэр бүхий хүмүүс мөнгө завшсан хэрэг” олны анхаарлын төвд орж ирлээ. Мянганы сорилын сангийн Цэвэр агаар төслөөр иргэдэд түлшний хэмнэлттэй зуух, дулаанаа барих дулаалга өгөх зэргээр олон ажил хийж байгааг иргэд биднэ. Тэгвэл иргэдэд хүргэх ёстой мөнгөнөөс иргэдэд дулаалга авч өгсөн хэмээн 120 гаруй иргэний үнэмлэхийг хуурамчаар ашиглан 66 сая төгрөгийг “Сэлбэ дулаан” компанид олгосон гэсэн хэрэгт Баянзүрх дүүргийн хороодын дарга нар, мөн дүүргийн Засаг дарга Б.Батзориг, “Сэлбэ дулаан” ХХК-ын захирал Н.Мөнхтогтохыг нарыг шалгаж байгаа.

Цэвэр агаар сан нь Мянганы сорилтын сангаас АНУ-ын буцалтгүй тусламжийн 285 сая орчим ам. долларын санхүүжилтээр таван жилийн хугацаанд хэрэгжүүлэх зургаан төсөл, хөтөлбөрийн нэг нь юм. Мөн Монгол Улсын Засгийн газрын Цэвэр агаар тусгай сан мөн үйл ажиллагаагаа явуулж байгаа. Дээр дурдсан дуулианаас үүдээд ижил зорилготой хоёр байгууллагын ижил нэртэй сан, төслийг андууран, Мянганы сорилын сангийн төслийн хөрөнгөөс шамшигдуулав уу, Засгийн газрын тусгай сан уу гэсэн эргэлзээ төрж магадгүй байгаа аж. Одоо үүсээд байгаа асуудал нь Мянганы сорилын сангийн төслийн санхүүжилт шамшигдуулсан тухай хэргийг шалгаж байгаа бөгөөд энэ нь Засгийн газрын харьяа Цэвэр агаар сангийн үйл ажиллагаатай огтхон ч хамааралгүй юм байна.