Британийн дуучин Сара Брайтман (Sarah Brightman) Олон улсын сансарын станцад жуулчин маягаар нисч очно гэж мэдэгдэгдэв. Брайтон Олон улсын сансрын станцад Оросын "Союз" хөлгөөр очоод тэнд 10 хоногийг өнгөрөөхөөр төлөвлөжээ.

"Би хөгжмийн хүн болохоос эрдэмтэн биш. 2013 оны нэгдүгээр сард миний шинэ цомог гарах бөгөөд түүнийгээ дэмжих аялан тоглолтоо хийнэ. 15 сарын дотор би бүх тивээр тоглолтоо хийнэ. Үүний дараа би сансарт нисэх зургаан сарын бэлтгэл сургууль хийнэ” гэж тэрээр ярьжээ.

Түүний аялан тоглолт нэгдүгээр сараас Канадад эхэлнэ. Шинэ цомог нь Dream Chaser ("Мөрөөдлөө дагасан хүн") нэртэй. Гол дууных нь нэг нь Angel сингл болно. Цомог ирэх жилийн нэгдүгээр сард худалдагдаж эхлэх ажээ.

Тэрээр 1969 онд хүн сансарт ниссэн кадрыг анх найман настайдаа харснаас хойш сансарт нисэхийг мөрөөдөх болсон гэнэ. "Би үргэлж л сансарт нисэхийг мөрөөдөж байлаа. Би дуу багатай, даруухан охин байсан. Мөрөөдлөө биелүүлнэ гэж бодож байсангүй. Харин одоо мөрөөдлөө биелүүлэх боломжтой болж байна. Энэ жилийн долдугаар сард  би Орост эмнэлгийн үзлэгт орсон. Эмч нар намайг сансарт нисэхийг зөвшөөрсөн” гэж дуучин ярив.

Алдартай хөгжмийн дуучин Брайтман сонгодог  кроссоверийн дэлхийн тэргүүлэх  дуучдын нэг. Анх бүжигчнээр карьераа эхлээд дараа нь  "Cats", " The Phantom of the opera" хөгжимт жүжгийн од болсон байна. Дэлхий даяар Сара Брайтманы 30 сая CD, DVD зарагдсан байна. Тэрээр 1992, 2008 оны Олимпийн тоглолтын нээлт дээр дуулж байсан юм.