Монголын эйрсофт спортын аварга шалгаруулах тэмцээн өнгөрсөн долоо хоногт болжээ. Тэмцээнийг Монголын эйрсофт сонирхогчдын холбооноос санаачлан зохион байгуулж, долоон багийн тамирчид өрсөлдсөн байна. Тэмцээнд тус холбооны ууган баг болох “Legion” баг түрүүлж, аваргын цом гардан авсан бол “Desert Hawks”   багийнхан хоёрдугаар байрыг эзэлжээ.

Эйрсофт спорт нь байлдааны галт зэвсгийн хуулбараар бүтээгдсэн буу зэвсгээр байт буудлага хийх, тактикийн бэлтгэл хийх зэргээр ашиглагддаг спортын төрөл юм. Манай улсад 2010 оноос хөгжсөн бөгөөд одоогоор 50 гаруй гишүүн, 300 орчим дэмжигчтэйгээр үйл ажиллагаа явуулж байна. Тус спорт  1970-аад оны үед Япон улсад үүсч, АНУ, Герман, ОХУ зэрэг улсад бие даасан спорт болж эрчимтэй хөгжиж буй юм.