Жоом идэгчийн уралдаанд тэргүүлсэн хүн уралдааны дүнг зарласны дараа нь нас барсан тухай Флорида мужийн Броуард  тойргийн шерифийн албаны сайтаар мэдээлсэн байна. 

Хэрэг явдал өнгөрсөн баасан гаригт уралдаан болсон Дирфилд-Бич хотын амьтны дэлгүүрт болжээ. Арга хэмжээний үр дүнг зарласны дараа хамгийн олон жоом идсэн 32 настай  Эдвард Арчболдын (Edward Archbold) бие нь муудан бөөлжиж эхэлжээ. 

Арчболд гудамжинд гарсан ч дэлгүүрийн ойролцоо ухаан алдан унасан байна. Түүнийг эмнэлэгт хүргэсэн ч сэхэл авалгүйгээр өөд болжээ. Шерифийн сайтад мэдээлснээр Арчболд хэдэн арван жоом, өт идсэн байна. Харин уралдаанд оролцогсод жоом идсэн ч бие нь зүгээр байв. Задлан шинжилгээгээр түүний үхлийн шалтгааныг тогтоох гэнэ.

Уралдаанд ялсан түүний шагнал нь амьд аварга могой байсан ба харин одоо шагналыг хэнд шилжүүлэх нь тодорхойгүй байна.