Япон улсын санхүүжилтээр 2009 оны зургадугаар сараас эхлэн барилгын ажлыг нь эхлүүлсэн “Нарны гүүр”-ийг аравдугаар сарын 17-нд ашиглалтад оруулах талаар Зам, тээврийн яамнаас мэдээлж байна. Тиймээс 262 метр урттай уг гүүрийн барилгын ажил бараг дууссан гэж хэлж болохоор болсон бөгөөд өчигдөр Зам, тээврийн яамны Техникийн комисс “Нарны гүүр”-ийг хүлээж авсан юм.

Энэ талаар Зам, тээврийн яамны Авто замын бодлогын хэрэгжилтийг зохицуулах газрын дарга Р.Ононгоос тодрууллаа.

-Одоогийн байдлаар “Нарны гүүр”-ийн барилгын ажил хэдэн хувийн гүйцэтгэлтэй байна вэ?

-“Нарны гүүр”-ийн барилгын ажлыг аравдугаар сарын 17-нд бүрэн дуусгаж, хөдөлгөөнийг нээх ёстой. Өнөөдрийн байдлаар 98 хувийн гүйцэтгэлтэй байна. Зам талбайн цэвэрлэгээ, замын урд, хойд хэсэгт зүлэгжүүлэх буюу тохижуулалтын бага зэрэг ажил л үлдсэн.

-Техникийн комисст хэчнээн хүн багтдаг вэ?

-Өчигдөр “Нарны гүүр”-ийг Техникийн комиссын шалгалтаар орууллаа. Комисст Мэргэжлийн хяналтын байгууллага, Нийслэлийн газрын алба, Байгаль орчин, ногоон хөгжлийн яамнаас нийт 17 мэргэжилтэн багтсан байгаа.

-Улсын комисс хэзээ хүлээж авах вэ?

-Техникийн комиссоос гаргасан шийдвэрийг Улсын комисст хүлээлгэж өгнө. Тэгэхээр энэ долоо хоногт багтаад Улсын комиссын шалгалтад орно. 

-“Нарны гүүр” ашиглалтанд орсноор замын хөдөлгөөний ачаалал хэр буурах бол?

-Одоогоор шалгалтад оруулж, үнэлгээг бүрэн тооцоолоогүй болохоор албан ёсны судалгаа хэлэх боломжгүй байна. Урьдчилсан байдлаар бол нийслэлийн замын хөдөлгөөний ачааллыг 30 хувиар бууруулах магадлалтай гэж үзсэн байгаа.