“Бүх шатны сонгуулийг өөрчлөн шинэчлэхэд идэвхтэй ажиллаж, ялангуяа хуулийг хэрэгжүүлэхэд бүртгэх, тоолох техник ашиглах зэргээр  шинэлэг арга барилаар ажилласан” хэмээн УИХ-ын Төрийн байгуулалтын Байнгын хорооны дарга А.Бакей Сонгуулийн Ерөнхий Хорооны даргаар ажиллаж байсан  Н.Лувсанжавын ажлыг үнэлэв. Өнөөдөр  түүнийг  Монгол Улсын Сонгуулийн Ерөнхий Хорооны даргын ажлаа Ч.Содномцэрэнд албан ёсоор хүлээлгэн өгөх үеэр тэрбээр ингэж хэлсэн юм.

Гурван удаагийн сонгуулийг  амжилттай зохион байгуулж,  Монголд төдийгүй Азид анх удаа сонгуульд  техник хэрэгсэл  ашиглах зэргээр шинэлэг олон зүйл хэрэгжүүлэхэд Н.Лувсанжавын хуульчийн мэдлэг, чадвар, туршлага их тус дэм болсныг СЕХ-ны даргаар томилогдсон Ч.Содномцэрэн энэ арга хэмжээний үеэр тэмдэглээд, түүнд цаашдын ажилд нь их амжилт, сайн сайхан бүхнийг хүсэн ерөөв.

Түүнчлэн СЕХ-ны дарга Ч.Содномцэрэн Монгол Улсад чөлөөт, ардчилсан сонгуулийг зохион байгуулж явуулах, сонгуулийн байгууллагыг бэхжүүлэх, сонгуулийн ажлыг  чадварлаг удирдан зохион байгуулсан учир  Н.Лувсанжавын нэрийг СЕХ-ны  “Хүндэт дэвтэр”- т бичиж  алдаршуулан үлдээж байгаагаа мэдэгдлээ. УИХ-ын Төрийн байгуулалтын Байнгын хорооны дарга А.Бакей СЕХ-ны шинэ, хуучин удирдлагууд ажил хүлээлцэх үеэр СЕХ-ны шинэ удирдлагад хандаж, удахгүй болох аймаг, сум, дүүргийн иргэдийн Төлөөлөгчдийн Хурлын сонгуулийг хуулийн дагуу шударга, маргаангүй зохион байгуулна гэдэгт итгэж байгаагаа илэрхийлсэн юм.

Сануулахад, өнгөрсөн баасан гаригт /X.05/ болсон УИХ-ын чуулганы нэгдсэн хуралдаанаар СЕХ-ны даргаас Н.Лувсанжавыг хүсэлтээр нь чөлөөлөх тухай асуудлыг хэлэлцээд хуралдаанд оролцсон 54 гишүүний 61,1 хувийн саналаар Н.Лувсанжавыг СЕХ-ны даргын ажлаас чөлөөлж, түүний оронд Ч.Содномцэрэнг СЕХ-ны даргаар томилсон билээ.