Латин Америк гаралтай залуу дуучин Бруно Марс NBC телевизийн “Saturday Night Live” шоунд оролцож, шинэ уран бүтээлээ хүргэх болсон тухай Twitter-тээ мэдэгджээ. Шоунд Бруно Марсаас гадна дуучин Мик Жаггер, Жастин Тимберлейк, Жениффер Лофез нар мөн оролцох гэнэ. “Saturday Night Live” шоу аравдугаар сарын 20-нд болох бөгөөд Грэммийн шагналт Бруно Марс  хамгийн сүүлийн шинэ бүтээлээ үзэгчдэд толилуулах ажээ. Хэдийгээр өөрөө амьдаар дуулж, үзэгчдэд хүргээгүй байгаа ч “Locked out of Heaven” нэртэй тэрхүү дуу нь Youtube сайтад хэдийнэ тавигджээ. Харин түүний “Unorthodox Jukebox” нэртэй шинэ цомог  ирэх арваннэгдүгээр сард хөгжим сонирхогчдын хүртээл болох юм.

Бруно Марс өнгөрсөн долдугаар сард “People” сэтгүүлийн “Эдүгээ цагийн хамгийн шилдэг эрэгтэй дуучид”-ын жагсаалтад багтсан. Тэрчлэн 53 дахь удаагийн Грэммийн шагнал гардуулах ёслолд зургаан номинацид нэр дэвшиж, “Шилдэг поп гоцлол” номинацийн  эзэн болон билээ.