Хүн бужигнаж, түм түчигнэсэн их хот маань өнгөө засч, цэцэглэн дэвшиж байна. Олон гадаадын брэндүүд салбар дэлгүүрүүдээ Улаанбаатар хотод нээн ажиллуулж, гадаад жуулчид, иргэдийн тоо ч эрс нэмэгдэж байгаа нь ч цаанаа олон зүйлийг өгүүлнэ.

Харин хотын маань урдаа барьдаг супермаркетаар орж үйлчлүүлэхэд, кассын ажилтан нь суучихсан, бохь зажилчихсан, дээр нь бас мөнгөөрөө худалдан авч байгаа зүйлсийг маань хээв нэг тоосон шинжгүй сканнердаж уншуулаад, лангууны нөгөө булан руу чулуудаж эхлэхэд дотор маань эвгүй оргиод л явчихав. Мэндийн зөрүү ч үгүй, дээр нь худалдан авч байгаа зүйлсийг минь чулуудаад л…Дараа нь өгч байгаа мөнгийг маань шүүрэн шахам аваад хариулт мөнгө, талоныг минь бас л лангуу руу шидээд намайг хариулт мөнгөө авч амжаагүй байтал шууд дараагийн хүнд үйлчилж эхэлнэ.

Хотын төвд байрлах бас нэг зоогийн газар орж сайхан хоол идье гэж бодлоо. Өмнө нь нэлээд хэд орж байсан болохоор ерөнхийдөө үйлчилгээ нь ямар болохыг нь мэдэж байв. Харин энэ удаа бүх юм өөр байлаа. Меню нь өөрчлөгдсөн харагдана. Байнга захиалдаг хоол маань байхгүй байсан тул өөр нэг хоол захиалахаар шийдэв. Хоолны орцыг дор нь бичсэн байв. Зөөгчөөс нь орцыг нь лавшруулан асуутал, яг л меню дээр бичигдсэний дагуу орцтой болохыг батлан хэлэв. Ингээд хоол захиалаад нэлээд удсаны эцэст захиалсан хоол маань ирлээ. Харин дотор нь меню дээр байсан орц огт байсангүй. Бүр нэг нь ч. Дээр нь хоолны өмнө ирдэг шинэхэн жигнэсэн талх, масло ч надад ирсэнгүй. Ингээд учир байдлыг лавлатал, меню нь андуурч бичигдсэн байж. Зөөгч нь ч менюгээ сайн мэддэггүй шинэ зөөгч байж таарав. Талх нь яасныг асуутал, хуучин л талх байгаа, шинэ талхаа жигнэж амжаагүй гэв. Ингээд л хоромхон зуур сайхан хоол идэх сэтгэл минь бүрмөсөн унтарч орхив. Уг нь бол, хотын төвд байдаг аятайхан л зоогийн газар юмсан.

Мэдээж бүх газар ийм биш. Гэхдээ л 100-ны бараг 90% нь үйлчилгээний соёлын асуудалтай байгаа нь үнэхээр харамсмаар. Ийм дүр зураг, үйлчилгээ бараг  байнга л шахам болдог болоод ч тэр үү, эхэндээ уур хүрч, бухимдлаа илэрхийлдэг байсан бол сүүлдээ хэлээд ч ойлгохгүй юм чинь гэж бодоод дуугүй л явдаг боллоо.

Манайх гадаадын бараа бүтээгдэхүүнийг зарж борлуулж байгаа бол бас тэдний үйлчилгээний соёл, стандарт техникээс ч бас суралцах ёстой гэж боддог. Учир нь өнөө цагт хүмүүс зөвхөн бараа бүтээгдэхүүний чанарыг голлохоос илүүтэй үйлчилгээний чанарыг нь харгалзаж сонголтоо хийдэг болсон. Харилцагч, үйлчлүүлэгч байхгүй бол, бизнес оршин тогтнохгүй гэдгийг мэддэг ажилтнууд тун цөөн мэт санагдана. Гадны хөгжилтэй улсуудад харилцагч бол хаан гэдгийг хилийн дээс алхаж үзсэн бүх хүн мэднэ.  Харин яагаад Монголд харилцагчийг хаан биш харин өстөн дайсан мэт үзэж, харьцдаг юм бол?

Энэхүү нийтлэлийг бичих болсон учир гэвэл, их хотын маань үйлчилгээний соёл сайжраасай, жинхэнэ чанартай үйлчилгээг үзүүлээсэй гэсэндээ бичиж байгаа юм. Мөн миний бие гадаадад олон жил сурч, амьдарч, ажиллаж байсан болохоор сурч мэдсэн зүйлсээ нийтлэлүүдээрээ дамжуулан бусадтайгаа хуваалцъя гэж бодлоо.

Харилцагчдад өндөр чанартай үйлчилгээ үзүүлнэ гэдэг бол аливаа бизнесийн эн тэргүүний анхаарах зүйл байх ёстой. Мөнгө чухал, гэхдээ харилцагчгүй бол танд мөнгө орж ирэхгүй.Харилцагчид бол хувирамтгай, тогтворгүй хүмүүс. Тэдэнд сонголт хийх өргөн боломжууд бий болсон. Авбал ав, байвал бай гэдэг үг аль хэдийнэ модноос гарсан. Харилцагчийг уурлуулж, бухимдуулах үед ихэвчлэн тэд дуугүй яваад өгдөг. Дахиж тэр газраар хэзээ ч үйлчлүүлдэггүй. Харин цаг завтай, эсвэл үнэхээр асуудлыг гаргаж ирье гэсэн харилцагчид л гомдол гаргадаг. Үүнийг нь харин байгууллагууд баяртайгаар хүлээн авч, алдаагаа ойлгож засах ёстой.

Харилцагчидтай нүүр тулж ажилладаг ажилтнуудыг хянаж байдаг менежерүүд гэж бараг байдаггүй. Тийм болоод ч тэр үү, ажилтнууд үйлчлүүлэгчидтэй тухайн өдрийн сэтгэл хөдлөл, хувь хүнийхээ зан авираар харилцаж харилцагчийн дургүйг хүргэдэг. Үүнээс болж харилцагч бухимддаг. Харин үүнийг бас л байгууллагын удирдлага мэддэггүй өнгөрдөг нь харамсалтай.

Ихэнх байгууллагууд маркетинг, гадаад үзэмжиндээ маш их мөнгө зарцуулж, анхаарлаа хандуулдаг боловч, ямар зан чанартай, ур чадвартай ажилтан авах вэ гэдэгт тийм сайн анхаарч чаддаггүй юм шиг. Тэр тусмаа харилцагчийн үйлчилгээгээ сайжруулахын төлөө хангалттай ажлуудыг хийдэггүй. Үүнээс болоод маркетинг, сурталчилгаанд зарцуулсан хамаг мөнгө нь агаарт замхардаг. Үнэндээ, ажилтны хэлсэн ганцхан буруу хариулт, эвгүй үйлдэл харилцагчийг үргээж орхидог.Тиймээс ажилтнуудаа сургах, тэдэнд харилцагчийн үйлчилгээний арга барил, техникийг заахаас гадна, хувь хүний сэтгэл зүйн талаар ч сургах шаардлагатай юм. Ингэснээр ажилтнууд харилцагчтай хэрхэн зөв харьцах, биеэ хэрхэн зөв авч яван, алдаа мадаггүй, түргэн шуурхай үйлчилгээ үзүүлэхийг сурч чадна. Мэдлэггүй ард түмэн мөхнө гэсэн эртний нэгэн үг байдаг.

Энэ хэрэгцээн дээр тулгуурлан “Customer King Consulting” худалдаа үйлчилгээний газруудад Харилцагчийн үйлчилгээний цогц сургалтуудыг санал болгож эхлээд байгаа бөгөөд тун удахгүй “Их хотын зйлчилгээний соёл” хэмээх тав хоногийн сургалтыг Улаанбаатар хотод анх удаагаа зохион байгуулах гэж байгааг дуулгахад таатай байна.