УИХ-аас замын хөдөлгөөнд оролцож буй иргэдийн эрх ашгийг хамгаалах зохицуулалт бүхий Жолоочийн хариуцлагын хуулийг  өнгөрсөн оны аравдугаар сард баталсан. Энэхүү хууль энэ оны нэгдүгээр сараас хэрэгжиж эхэлсэн. Харин энэ сарын 1-нээс хариуцлагын даатгалдаа хамрагдаагүй жолоочийг хөдөлмөрийн хөлсний доод хэмжээ буюу 140400 төгрөгөөр торгож, машиныг нь журамлаж эхэлнэ гэж анхааруулж байсан билээ. Энэ талаар Замын цагдаагийн газрын Олон нийттэй харилцах тасгийн дарга, цагдаагийн хошууч C.Энхбатаас тодрууллаа.

-Даатгалд хамрагдаагүй жолоочдыг торгож  машиныг нь шууд л журамлана гэсэн. Хоёр өдрийн туршид хэдэн жолоочийг журамлаад байна? 

-Замын цагдаагийн бие бүрэлдэхүүн бүрэн бүрэлдэхүүнээрээ ажиллаж, хяналт тавьж байгаа. Өнөөдрийн /өчигдрийн/  байдлаар даатгалд хамрагдаагүй нэг ч жолоочийг илрүүлээгүй байна гэсэн мэдээ ирсэн. Манай жолооч нар их ухамсартай болсон нь илт ажиглагдаж байна. Өөрөөр хэлбэл, даатгалдаа сайн хамрагдсан байна.

-Тухайн жолооч даатгалаа төлөөгүй бол шууд 140 мянгаар торгох уу?

-Энэхүү торгууль иргэд, жолооч нарын хувьд чангадсан мэт санагдаж магадгүй. Гэхдээ жолооч нар өөрсдийгөө эрсдлээс хамгаалж байна гэдгийг сайн ойлгох хэрэгтэй. Тиймээс торгууль төлж, журамлуулахаасаа өмнө машинаа түр жолоодохгүй байж байгаад л даатгалаа төлчих ёстой юм. Хэрэв тухайн жолооч даатгалд хамрагдаагүй л бол шууд 140400 төгрөгөөр торгож, машиныг нь журамлах болно. Даатгалаа хийлгэсэн цагтаа л журмын хашаанаас машинаа гарган авч болно гэсэн үг.

Энэ дашрамд та даатгалд хамрагдсанаар зам тээврийн осол гаргасан тохиолдолд ослын улмаас бусдын амь нас, эрүүл мэнд, эд хөрөнгөд учирсан хохирлыг буюу 10 сая хүртэлх хохирлыг нөхөн төлүүлэх боломжтой болно гэдгийг дахин сануулья. Тээврийн хэрэгслийн өмчлөгч бүр даатгалд хамрагдах ёстой бөгөөд C,D ангиллын тээврийн хэрэгслээр замын хөдөлгөөнд оролцох жолооч нь тээврийн хэрэгслийн өмчлөгч эсэхээс үл хамааран жолоочийн хариуцлагын даатгалд хамрагдах юм байна. Хэрэв гэр бүлийнхэн дундаа ганц машинтай бол тэрхүү машины дугаар дээр гэр бүлийн гишүүн жолооч нар даатгалд хамрагдаж болох юм байна. Даатгалын нөхөн төлбөр болон хураамж нь жолоочийн ангиллаас хамаарч өөрчлөгдөх юм байна. Тодруулбал,

	Тээврийн хэрэгслийн ангилал	Нэг удаагийн төлбөрийн дээд хэмжээ	Даатгалын суурь хураамж
1	“А” ангиллын тээврийн хэрэгсэл	5 сая төгрөг хүртэл	12500
2	“В” ангиллын тээврийн хэрэгсэл	5 сая төгрөг хүртэл	33000
3	“С” ангиллын тээврийн хэрэгсэл	10 сая төгрөг хүртэл	42500
4	“Д” ангиллын тээврийн хэрэгсэл	10 сая төгрөг хүртэл	53000
5	“Механизм ангиллын тээврийн хэрэгсэл”	5 сая төгрөг хүртэл	12500
6	Мэргэшсэн болон С,Д ангиллын жолоочийн даатгалын суурь хураамжийн хэмжээ		33000

Санхүүгийн зохицуулах хорооноос албан журмын даатгалын үйл ажиллагаа эрхлэх тусгай зөвшөөрөлтэй даатгалын компаниудыг тогтоож өгчээ. Жолооч нар дараахи даатгалын компаниудаас сонголтоо хийж даатгуулах боломжтой. Үүнд,

	Даатгалын компанийн нэрс	Хаяг, байршил	Харилцах утас
1	Мөнх даатгал	СБД, 8-р хороо, бага тойруу 49,8-ийн 603 тоот	321851, 331332
2	Номин даатгал	ЧД, Энхтайваны өргөн чөлөө, УИД-ийн 6 давхар	330023 99090679
3	Миг даатгал	ЧД, Энхтайваны өргөн чөлөө Миг даатгал компаныбайр	330130 330131
4	Соёмбо даатгал	СБД, Олимпийн гудамж, Гранд оффис, 2 тоот	77220707 77115555
5	Ард даатгал	СБД, Сүхбаатарын талбай-2, Сентрал таур, 505	77200088 368376
6	Монгол даатгал	СБД, 1-р хороо, Энхтайваны өргөн чөлөө, 13, “Монгол даатгал” ХХК-ийн байр	320524 70170000
7	Моннис даатгал	СБД, 12 хороо, нарны зам 13, Нисссан төв 2 давхарт	70117106
8	Тэнгэр даатгал	СБД 8-р хороо “City center”–ийн байр 11 давхар	312234
9	Бодь даатгал	ЧД, 15/160 Сүхбаатарын талбай, Бодь цамхаг 400 тоот	70110280 3234444
10	Монре даатгал	СБД бага тойруу, 37Б, “Монреимпекс” ХХК-ийн байр	70090000
11	Улаанбаатар хотын даатгал	СБД, 2-р хороо, Тээвэрчдийн гудамж, Жигүүр гранд, оффис центр 401 тоот	70119827 55253399
12	Практикал даатгал	ЧД, 1-р хороо, Энхтайваны өргөн чөлөө-4, Express цамхаг 9 давхарт	331525 312131
13	Гэр даатгал	ЧД-ийн 1-р хороо Энхтайваны өргөн чөлөө Аризона төвийн 64 тоот	70139090
14	Мандал даатгал	СБД Сөүлийн гудамж, 7/1 Мандал оффис	70107007 70117017
15	Ганзам даатгал	БГД 2-р хороо Сөүлийн гудамж 45, “Одод” цогцолбор 3-201	242667 242634

Зам тээврийн осол гаргасан бол жолооч та,

Осол гаргасан даруйдаа Жолоочийн даатгалд даатгуулсан тухайгаа хохирогч болон даатгалын компанидаа  мэдэгдэх хэрэгтэй.  Мөн Цагдаагийн байгууллагад хандан даатгалын баталгааг шалгуулах ёстой юм байна. Эцэст нь даатгалын тохиолдол болон нөхөн төлбөрийн хэмжээг тогтооход шаардлагатай мэдээллийг эрх бүхий этгээдэд гаргаж өгөх шаардлагатай.