2012.12.21…Энэ өдөр, энэ тоо сүүлийн үед монголчуудыг талцуулж, айлгаж, сандаргаж байна. “Дэлхий сөнөнө” гэсэн автортой болоод буй энэ сэдвийн талаар өнөөдөр албаны хүмүүс буюу “Одон орон, геофизикийн судалгааны төв” /ООГСТ/-өөс / мэдээлэл өглөө. ООГСТ-ийн ахлах мэргэжилтэн Н.Тунгалаг нарын судлаачид энэхүү хэвлэлийн бага хуралд оролцов. Тэд “12 сарын 21-нд дэлхийг түнэр харанхуй бүрхэнэ, дэлхий дээр аварга солир бууна гэх элдэв янзын цуу гарах болж. Энэ бол шинжлэх ухааны ямар ч ойлголтгүй хүмүүсийн тарааж байгаа зүйл” гэдгийг хурлын үеэр онцоллоо.

ООГСТ-ийн судлаачдын хэлснээр бол, дэлхийд ойртож байгаа буюу тойрог замтай нь огтлолцох бага гаригууд байдаг ч дэлхий дээрх амьдралд нөлөөлөх аюултай сансрын биет байхгүй гэдгийг олон орны эрдэмтэд тогтоосон байдаг аж. Жишээлбэл, тэдгээр гаригаас хамгийн ойрдоо 2036 онд дэлхийтэй 0,2 одон орны нэгжээр ойртох ч тэр нь аюул учруулахгүй гэв.

Харин дэлхийг гурав хоног түнэр харанхуй нөмөрнө гэдэг төөрөгдлийн хувьд тэд “Нарыг бүрэн хэмжээгээр халхалж чадах том хэмжээний гариг нарны аймагт байхгүй учраас юу ч нарыг удаан хугацаанд халхалж, дэлхий харанхуйлах боломжгүй юм. Мөн наран дээрх дэлбэрэлтүүд 6,7 миллиярдын жилийн дараа л нарыг сөнөөх боломжтой учраас тэр бол нар дэлхийг баталгаатай гэрэлтүүлсээр байна. Наран дээрх дэлбэрэлтүүд дэлхийд ямар ч аюулгүй. Яагаад гэвэл дэлхийн соронзон орон нарнаас ирсэн ямар ч биетийг хоёр туйл руугаа хөөдөг байгалийн хамгаалалттай байдаг. Тийм учраас дэлхийд 12 сарын 21-ээс хойш амьдрал үргэлжлэнэ гэдэгт итгэлтэй байж болох юм байна.