Өнөө цагийн хөлбөмбөгийн шилдэг менежерүүдийн нэгт зүй ёсоор тооцогдох “Онцгой нэгэн” хочит Жозе Моуриньо “Реал Мадрид” дахь ажлаа дууссаны дараа Английн хөлбөмбөгийн ертөнцөд ирнэ гэдгээ мэдэгджээ. Гэхдээ тэр “Сантьяга Бернабеу” дэх одоогийн ажилдаа сэтгэл хангалуун байдгаа илэрхийлсэн байна. Английн “Челси” клубын экс-дасгалжуулагч “Реал”-д ажиллахаар 2016 он хүртэл гэрээ байгуулсан, гэхдээ түүний дараагийн ажил Премьер лигт байх гэнэ. Энэ тухай Жозе Моуриньо “Би үүнийг нууж хаалгүй хэлж чадна. Миний дараагийн алхам Англид байх болно. Үүнд маш олон шалтгаан бий. Гэхдээ хэзээ гэдгийг би хэлж мэдэхгүй, одоохондоо санаа оноо алга. Энэ цаг мөчид дэлхийн хамгийн шилдэг клубыг дасгалжуулж байгаадаа сэтгэл хангалуун байна” хэмээжээ.

Жозе Моуриньо “Челси” клубыг дасгалжуулж байгаад багийн эзэн Роман Абрамовичтай таагүй харилцааны улмаас 2007 онд багаа орхисон. Гэхдээ “Англид дахин ажиллах бол Орос тэрбумтны удирдлага дор дахин “Челси”-г дасгалжуулах уу” гэсэн сэтгүүлчийн асуултад Моуриньо “Мэдээж, тэгэлгүй яахав” хэмээн хариулжээ. Мөн “Манчестер Юнайтед”-ын дасгалжуулагч Сэр Алекс Фергусон “тэтгэвэртээ гарах” цагт түүнийг залгамжлах хамгийн өндөр магадлалтай хүнээр “Онцгой нэгэн”-ийг нэрлэж буй тухайд тэрбээр “Хамгийн төгс хувилбар гэвэл намайг эндэх ажлаа дуусгаад Англид очиход тэр дасгалжуулагч хэвээр л байх болно. Миний хувьд тэр бол босс. Тэр дасгалжуулагч нарын босс болохоор би түүнийг босс гэж дууддаг юм. Намайг Английн хөлбөмбөгт эргэн очиход Сэр Алекс “Манчестер Юнайтед”-ын дасгалжуулагч хэвээр байх болно гэдэгт итгэж байна” хэмээжээ.