Туркийн Анкара хотноо зохиогдсон дэлхийн шилдэг 12 эмэгтэй шатарчдын Гран При тэмцээн есдүгээр сарын 16-нд эхэлж, 28-нд дүнгээ гаргалаа. Энэ тэмцээнд манай их мастер Б.Мөнгөнтуул 8 дугаар өрөгт Энэтхэгийн их мастер Конеру Хампи, есдүгээр өрөгт Литвийн их мастер Виктория Чмилите, аравдугаар өрөгт Хятадын их мастер Руан Луфей нартай тэнцэж, 11 дүгээр өрөгт Хятадын их мастер Жу Венжинийг хожсоноор нийт зургаан оноотойгоор зургаадугаар байрт шалгарав. Мөнгөнтуул нийт 11 өрөг тоглохдоо хоёр хожиж, найм тэнцэж, нэг хожигдон амжилттай тоглосноор өөрийн рейтингийг 14 пунктээр нэмжээ.

Энэ тэмцээнийг Энэтхэгийн их мастер Конеру Хампи тэргүүлж, Словяны их мастер Анна Музычук, Хятадын их мастер За Сюэ нар удаалав.