АНУ-д ажлын айлчлал хийсэн Монгол Улсын Ерөнхийлөгч Цахиагийн Элбэгдорж амралтын өдрүүдэд АНУ-ын Смитсонионы хүрээлэнд зочлов. Энэ үеэр тус хүрээлэнгийн эрдэмтэд хүрээлэнгийнхээ үйл ажиллагааг Монгол Улсын Ерөнхийлөгчид танилцуулахын зэрэгцээ тус хүрээлэнгээс Монгол Улсад хэрэгжүүлж буй эрдэм шинжилгээ, археологийн судалгаа, төслийн талаар дэлгэрэнгүй танилцууллаа.

Мөн тус хүрээлэнгээс АНУ дахь Монгол Улсын Элчин сайдын яамтай хамтран Монголын соёлын өвийг дэлхий дахинд сурталчлах зорилгоор 2015 онд “Smithsonian Folklife festival”-ыг Вашингтон хотноо зохион байгуулах зорилготой байгаагаа Ерөнхийлөгчид хэллээ. Уг Фестивал нь АНУ-ын Вашингтон хотын Үндэсний цэцэрлэгт хүрээлэнд жил бүр болдог үндэсний өв соёлын наадам юм. Фестивал нь долдугаар сарын баярын өдрүүдийн үеэр хоёр долоо хоногийн турш үргэлжилдэг бөгөөд анх 1967 онд олон улсын соёл уламжлалыг харуулсан хэлбэрээр зохион байгуулагдаж эхэлжээ. Смитсонианы хүрээлэнгийн цогцолбор нь 16 музей, галерейгээс бүрдэх бөгөөд 142 сая үзмэртэй аж.