Монголын анхны “boy band”-уудын нэг “Номин талст” хамтлаг ирэх амралтын өдөр буюу есдүгээр сарын 29, 30-нд  “UB Palace”-ын концертын их танхимд 15 жилийн ойдоо зориулсан нүсэр тоглолт хийх гэж байна. “Номин талст 15 жил” тоглолтын тасалбар өнгөрсөн даваа гаригт худалдаанд гарсан даруйдаа л үзэгчдийн дунд эрэлт үүсгээд байгаа юм. Тэд ойдоо зориулан хийж буй уг тоглолтоо 100 хувь амьд хөгжмийн хамтлагтай эгшиглүүлнэ гээд олон олон сюрприз үзэгчдийг хүлээж байгаа юм. Мөн хуучны хит дуунуудыхаа дууны найруулгыг шинэчлэн хийсэн нь тэдний тоглолт дээр анх удаа үзэгчдэд амьдаар хүрэх гэнэ. Түүнчлэн нас чацуу “Sweetymotion” хамтлагийхантай тэд нэгэн шинэ дуэт  хийсэн нь “Номин талст 15 жил” тоглолт дээр анх удаа дуулагдах юм. Уг дууны аяыг “Харанга”-ын Чука зохиосон бол үгийг нь “Номин талст” хамтлагийнхан “Харанга”-ын Лхагваатай хамтран зохиожээ. Шинэ дуэтын үгнүүд хоёр хамтлагийн дууны нэрнүүдээс бүтсэн гээд тун ч өвөрмөц дуу төрсөн гэнэ.

“Номин талст 15 жил” тоглолтын тасалбар суудлын зэрэглэлээсээ хамааран 20, 30, 50 мянган төгрөгийн үнэтэй юм.