Нийслэлийн “Улаанбаатар” чуулгын гоцлол дуучин, Гавьяат жүжигчин Т.Баяраа, уртын дуучин Ч.Дорж, О.Анхчимэг нарын хамтарсан “Хүйн холбоот” хэмээх ардын урлагийн тоглолт энэ сарын 28-нд ганцхан удаа болох нь ээ.

“Улаанбаатар” чуулгад болох уг тоглолтод баруун монгол, халх, буриад гэсэн гурван үндэсний өвөрмөц уран бүтээлүүд эгшиглэх юм байна. 

Монголын ахмадын холбоотой хамтран зохион байгуулж буй энэ тоглолтын ерөнхий найруулагчаар Урлагийн гавьяат зүтгэлтэн Л.Эрдэнэбулган ажиллаж байгаа бол туслах найруулагчаар “Улаанбаатар” чуулгын найруулагч П.Урнаа, удирдаачаар Соёлын тэргүүний ажилтан Д.Нямдаш, Р.Ганбат нар ажиллана. Тоглолтонд “Улаанбаатар” чуулгын “Хангарьд” үндэсний найрал хөгжимчид, дуучид, бүжигчид, бүрэн бүрэлдэхүүнээрээ оролцох юм. Түүнчлэн үндэсний хөгжмийн “Алтан ураг”, “Гэрэгэ” хамтлаг оролон үзэгчдийн сонорыг мялаах нь.