УДЭТ өвөл цагийн нээлтээ драмын бүтээлийн ноён оргил болсон дэлхийн суу билэгт их зохиолч Уилльям Шекспирийн алдарт "Гамлет" жүжгээр ирэх арваннэгдүгээр сард нээх гэж байгаа билээ.

33 жилийн дараа алдарт “Гамлет” жүжгийг драмын театрын тайзнаа дахин амилуулахаар найруулагч нарын дунд өнгөрсөн тавдугаар сард тендер зарлаж, театрын отгон найруулагч Н.Наранбаатар ялсан юм.

Тэрбээр өнгөрсөн наймдугаар сард “Гамлет” жүжигт тоглох жүжигчдийн нэрсийг зарласан. Алдарт “Гамлет” жүжгийн гол дүр буюу Гамлетад УДЭТ-ын жүжигчин С.Болд-Эрдэнэ тоглохоор сонгогдсон бол түүний ээж Гертугтагын дүрийг Гавьяат жүжигчин У.Уранчимэг амилуулан, Клаудид Төрийн соёрхолт Д.Сосорбарам, Полонийд Гавьяат жүжигчин Д.Жаргалсайхан нар тоглох юм байна.

Харин Гамлетын хайрт бүсгүй Опелиад тоглох эмэгтэй жүжигчинг хараахан сонгоогүй юм. Учир нь энэ дүр дээр УДЭТ-аас найруулагчийн зөвшөөрөлтэйгөөр нээлттэй сонгон шалгаруулалт явуулахаар болжээ.

Сонгон шалгаруулалтын өнгөрсөн сард эхэлсэн бөгөөд ирэх аравдугаар сарын 3нд УДЭТ-т эцсийн шалгаруулалт нээлттэйгээр болох гэж байна.